شمالی وزیرستان،سکیورٹی فورسز کی بڑی کارروائیاں27 دہشتگرد جہنم واصل

خیبرپختونخوا کے ضلع شمالی وزیرستان میں سکیورٹی فورسز نے72 گھنٹوں کے دوران کارروائیوں میں 27 خوارج کو ہلاک کردیا۔

آئی ایس پی آر سے جاری بیان کے مطابق سیکیورٹی فورسز نے خفیہ اطلاعات پر مبنی کارروائیوں کے سلسلے میں شمالی وزیرستان کے علاقے میران شاہ میں متعدد مقامات پر کارروائیاں کیں۔

بیان میں کہا گیا کہ گزشتہ 72 گھنٹوں کے دوران بھارتی سرپرستی میں سرگرم فتنہ الخوارج سے تعلق رکھنے والے 27 دہشت گرد ہلاک کر دیے گئے ہیں۔

آئی ایس پی آر نے بتایا کہ سیکیورٹی فورسز نے میران شاہ کے عمومی علاقے میں خوارج کے متعدد ٹھکانوں کو نشانہ بنایا، کارروائیوں کے دوران سیکیورٹی فورسز اور دہشت گردوں کے درمیان شدید فائرنگ کا تبادلہ ہوا جس کے نتیجے میں 27 خوارج مارے گئے۔

بیان میں بتایا گیا کہ ہلاک دہشت گردوں کے قبضے سے بھاری مقدار میں اسلحہ اور گولہ بارود بھی برآمد کیا گیا، ہلاک ہونے والے دہشت گرد معصوم شہریوں کے قتل اور دہشت گردی کی مختلف سرگرمیوں میں ملوث تھے۔

آئی ایس پی آر نے مزید بتایا کہ اس گروہ کے خاتمے کے ذریعے میران شاہ میں معروف شخصیت شہید ملک سیف اللہ داوڑ کے ٹارگٹ کلنگ کے واقعے کا بدلہ لے لیا گیا ہے اور اس جرم میں ملوث عناصر کو منطقی انجام تک پہنچا دیا گیا ہے۔