عدنان صدیقی کی نواز شریف سے ملاقات پر ہنگامہ کیوں؟
معروف پاکستانی اداکار عدنان صدیقی کی لندن میں سابق وزیر اعظم میاں نواز شریف کے ساتھ ہونے والی ملاقات نے سوشل میڈیا پر ایک ہنگامہ برپا کر دیا ہے۔
عدنان صدیقی اپنی اداکاری کی وجہ سے تو سرخیوں میں رہتے ہی ہیں لیکن اس مرتبہ وہ سیاسی ملاقات کی وجہ سے سوشل میڈیا پر ٹرینڈنگ میں آ گئے، عدنان صدیقی کی لندن میں مسلم لیگ ن کے قائد نواز شریف سے ملاقات پر سوشل میڈیا میں ملے جلے ردعمل کا اظہار کیا جا رہا ہے۔
پچھلے ماہ تحریک عدم اعتماد کے نتیجے میں عمران خان کی حکومت ختم ہوئی تو تحریک انصاف نے ملک بھر میں احتجاجی مظاہروں کا اعلان کیا، ان مظاہروں میں عام شہریوں کے ساتھ متعدد اداکاروں اور گلوکاروں کی موجودگی بھی نظر آئی۔
جو احتجاج میں شریک نہ ہوئے انہوں نے سوشل میڈیا پر اپنے پیغامات کے ذریعے پی ٹی آئی کی حمایت کی، ان اداکاروں میں شان شاہد، صبا قمر اور ماہرہ خان جیسے انڈسٹری کے بڑے نام شامل ہیں، اسی طرح پاکستان مسلم لیگ (ن) کے حق میں بھی کچھ اداکار اور گلوکار بشمول ریشم اور وارث بیگ متحرک نظر آئے، زویا اختر کی فلم ’دی آرچیز‘، ’حقیقی زندگی میں اقربا پروری پر مبنی ہے۔
پاکستانی انڈسٹری کے ایک اور بڑے اداکار عدنان صدیقی بھی گذشتہ ہفتے لندن میں نواز شریف سے ملاقات کرتے نظر آئے، سابق وزیراعظم سے ملاقات کے بعد صحافیوں سے گفتگو کرتے ہوئے عدنان نے کہا کہ ’بہت زبردست میٹنگ رہی، میں اپنی فلم کے حوالے سے لندن آیا تھا، ادھر ہم اپنی پروموشن کر رہے ہیں تو میں نے سوچا کہ نوازشریف کو بھی مدعو کروں کہ وہ آ کر ہماری فلم دیکھیں، کیونکہ ہم نے بڑی محنت سے فلم تیار کی ہے۔ عدنان صدیقی کے مطابق نواز شریف نے انہیں بتایا کہ ہم آپ کی برادری کے لیے بھی بہت کچھ سوچ رہے ہیں اور فلم پالیسی کے حوالے سے بھی گفتگو ہوئی، اس ملاقات کے بعد سوشل میڈیا پر عدنان صدیقی کا نام پاکستان میں ٹاپ ٹرینڈ میں سے ایک ہے اور صارفین بھی اس پر تبصرے کر رہے ہیں جس میں طنز و مزاح کا رنگ غالب نظر آتا ہے۔
میاں داؤد نامی صارف نے عدنان صدیقی اور نواز شریف کی تصویر شیئر کرتے ہوئے پی ٹی آئی پر طنز کیا کہ ’امریکی سازش کا ایک اور ثبوت۔ پاکستان کے معروف اداکار عدنان صدیقی کی امریکی صدر جو بائیڈن کے کہنے پر نواز شریف سے ملاقات، اسی تصویر کو سیٹھ عبداللہ نامی صارف نے بھی شیئر کیا اور لکھا کہ ’ان میں سے ایک عظیم اداکار ہے اور دوسرے عدنان صدیقی۔
زہرہ لیاقت نامی صارف نے ہمایوں سعید اور عدنان صدیقی کے مشہور ڈرامے ’میرے پاس تم ہو‘ کا ایک کلپ شیئر کیا اور پی ٹی آئی کے حامیوں کا ری ایکشن مزاح کے طور پر ظاہر کرنے کی کوشش کی، اس ویڈیو میں ہمایوں سعید عدنان صدیقی کو تھپڑ مار رہے تھے۔
ایسا نہیں کہ عدنان صدیقی عمران خان کو پسند نہیں کرتے یا ان کے مخالف ہیں، پی ٹی آئی کی حکومت جانے سے قبل مارچ کے مہینے میں ایک ٹویٹ میں کہا تھا کہ عمران خان ایک عوامی لیڈر ہیں، ان کے لیے لوگوں کی محبت اس بات کا ثبوت ہے۔
عدنان صدیقی نے مزید لکھا تھا کہ پاکستان کی خاطر انہیں ہٹانے سے بہتر ہے کہ مدت پوری کرنے دی جائے لیکن اب ان کی نواز شریف سے ملاقات نے مداحوں کی سوچ کو تقسیم کر دیا ہے، البتہ عدنان صدیقی کا کہنا ہے کہ وہ نواز شریف کو اپنی فلم دیکھنے کے لیے مدعو کرنے گئے تھے، اور نواز شریف نے فنکاروں اور فلم انڈسٹری کی بہتری کیلئے اقدامات کی بھی یقین دہانی کرائی ہے۔
