فیروز خان کی شرمین عبید چنائے پر سخت تنقید
اداکار فیروز خان نے سونیا حسین کی حمایت کرتے ہوئے ایوارڈ یافتہ فلم ساز شرمین عبید چنائے پر سخت تنقید کرتے ہوئے انہیں دوسروں کے پیسے کھا جانے والی قرار دیا ہے۔
فیروز خان نے شرمین عبید چنائے کی جانب سے سونیا حسین کے پرانے بیان پر ناخوشی کا اظہار کرنے کے بعد ان پر تنقید کی۔
شرمین عبید چنائے نے حال ہی میں سونیا حسین کے ایک پرانے بیان کے وائرل ہونے پر ناخوشی کا اظہار کرتے ہوئے انہیں ہدایت کی تھی کہ وہ دوسری خواتین کی عزت کریں۔
سونیا حسین کا تین سال پرانہ بیان حال ہی میں ایک سوشل میڈیا پیج کی جانب سے شیئر کیے جانے کے بعد وائرل ہوا تھا، جس پر شرمین عبید چنائے نے برہمی کا اظہار کیا تھا۔
سونیا حسین نے تین سال قبل ہم ٹی وی پر نشر ہونے والے یاسر حسین کے شو میں ایک سوال کا جواب دیتے ہوئے کہا تھا کہ اگر وہ ماہرہ خان ہوتیں تو بولی وڈ فلم ’رئیس‘ میں کام نہ کرتیں۔
پروگرام کے میزبان نے سونیا حسین سے پوچھا تھا کہ اگر وہ ماہرہ خان ہوتیں تو کون سی فلم میں کام نہ کرتیں اور پھر میزبان نے انہیں آپشن کے طور پر ماہرہ خان کی تین فلموں ’ورنہ، رئیس اور ہو من جہاں‘ کے نام بتائے تھے۔
سونیا حسین نے جواب میں کہا تھا کہ اگر وہ ماہرہ خان ہوتیں تو بھارتی فلم ’رئیس‘ میں کام نہ کرتیں، جس پر میزبان نے ان سے تعجب سے پوچھا تھا کہ وہ بولی وڈ بادشاہ شاہ رخ خان کے ساتھ کیوں کام نہ کرتیں؟
شرمین عبید چنائے نے سونیا حسین کو درس بھی دیا تھا—اسکرین شاٹ
جس پر سونیا حسین نے واضح کیا تھا کہ اس لیے کہ انہیں لگتا ہے کہ اداکار کو اپنا کردار دیکھ کر اداکاری کرنی چاہیے، نہ کہ صرف ہیرو کی سائیڈ میں رہنے کی وجہ سے کردار ادا کرنا چاہیے۔
سونیا حسین کے مذکورہ بیان کے دوبارہ وائرل ہونے پر شرمین عبید چنائے نے سوشل میڈیا پر کمنٹس کرتے ہوئے ان کے بیان پر ناخوشی کا اظہار کیا تھا اور انہیں ہدایت کی تھی کہ وہ خود کو ماہرہ حسین سے تشبیح نہ دیں۔
شرمین عبید چنائے نے سونیا حسین کے لیے لکھا تھا کہ وہ خود کو ماہرہ خان سے تشبیہ نہ دیں، وہ کبھی بھی ماہرہ خان نہیں بن سکتیں، اس لیے انہیں ایسا کہنے کی ضرورت بھی نہیں ہے۔
شرمین عبید چنائے نے سونیا حسین کو مزید ہدایات دیتے ہوئے لکھا تھا کہ انہیں انڈسٹری میں موجود دوسری خواتین کی ایسے بے ادبی نہیں کرنی چاہیے، کیوں کہ ایسی بات کرنے سے ان کی پرورش کی عکاسی بھی ہوتی ہے۔
بعد ازاں سونیا حسین نے بھی شرمین عبید چنائے کو کرارا جواب دیتے ہوئے ان پر واضح کیا تھا کہ انہیں ماہرہ خان بننے کی خواہش نہیں، ان کی اپنی اہمیت اور شناخت ہے۔
