پاکستانیوں کا سنتھیا کو چندہ دینے سے انکار، اپنی اپیل واپس لے لی

مشکوک امریکی خاتون سنتھیا ڈی رچی نے پاکستانی ٹوئٹر صارفین کی جانب سے رحمان ملک کے خلاف ریپ کا مقدمہ لڑنے کے لیے لئے مالی مدد کے نام پر چندہ دینے سے انکار اور اس عمل پر تنقید کے بعد اپنی اپیل واپس لے لی ہے۔
یاد رہے کہ سنتھیا رچی نے ٹوئٹر پر ایک پیغام کے ذریعے پاکستانیوں سے اپیل کی تھی کہ انہیں رحمان ملک کیخلاف ریپ کا کیس لڑنے کے لیے مالی امداد چاہئے تاکہ وہ اپنے وکلا کی فیس ادا کر سکیں۔ تاہم ان کی اس اپیل کو سوشل میڈیا صارفین نے شدید تنقید کا نشانہ بنایا اور لکھا کہ آپ پاکستان کو بد نام کرنے کی خاطر پاکستانیوں سے ہی چندے کا تقاضہ کر رہی ہیں جس پر آپ کو شرم آنی چاہیے۔
کئی صارفین نے لکھا کہ پہلے تو صبا ٹائپ کی خواتین موبائل کے لیے بیلنس مانگنے کے نام پر پاکستانیوں کو ماموں بنا کر پیسے اکٹھے کرتی تھیں اور اب وہی کام سنتھیا نے شروع کر دیا ہے۔ صارفین نے یہ بھی لکھا کہ سنتھیا کے چندہ مانگنے کے عمل سے ثابت ہوگیا ہے کہ وہ کس کے ایما پر یہ کام کر رہی ہیں۔ یاد رہے کہ ماضی میں وزیراعظم عمران خان اور سابق چیف جسٹس ثاقب نثار ڈیم کے نام پر پاکستانیوں سے چندہ مانگتے رہے ہیں۔
یاد رہے کہ اپنی ایک ٹویٹ میں ایکسپائر ویزے پر پاکستان میں موجود مشکوک امریکی عورت نے لکھا تھا کہ پاکستان پیپلز پارٹی کے راہنماوں کے خلاف قانونی لڑائی لڑنے کیلئے انہیں فنڈز کی ضرورت ہے۔ انہوں نے اپنا اکاونٹ نمبر دیتے ہوئے کہا پاکستانی اس میں انہیں رقم بھیجیں تاکہ وہ پی پی پی کی قیادت کے خلاف لگائے گے الزامات کا دفاع کرسکیں۔۔ انہوں نے اپنی ٹویٹ میں کہا کہ ‘رحمان ملک، سابق وزیراعظم گیلانی اور پیپلز پارٹی کا مقابلہ کرنا آسان نہیں ہوگا۔ لیکن میرا پکا ارادہ ہے کہ میں ان کا ڈٹ کر مقابلہ کروں گی۔’ سنتھیا نے لکھا کہ ‘مجھے قانونی لڑائی کے لیے بل ادا کرنا ہوں گے۔ انہوں نے اپنے ٹویٹ میں پاکستانی اکاؤنٹ نمبر کی تصویر بھی شئیر کی اور لکھا کہ وہ لوگ جو پیپلز پارٹی کے رہنماؤں سے لڑنے میں میری مدد کرنا چاہتے ہیں، میرے اس اکاونٹ میں پیسے بھجوایئں’۔
لیکن سنتھیا کی مالی مدد سے متعلق اس ٹویٹ نے سوشل میڈیا صارفین کو ٹرولنگ کا موقع دے دیا جس کے بعد سنتھیا کو اپنی یہ ٹویٹ ڈیلیٹ کرنا پڑی۔ معاذ نامی صارف نے لکھا کہ ‘ڈیم فنڈ اور کرونا فنڈ کے بعد اب ہمارے پاس سنتھیا فنڈ ہے۔’ صحافی مبشر زیدی نے لکھا کہ ‘کیا وقت آگیا ہے کہ صبا کے بعد اب سنتھیا بھی بیلنس مانگ رہی ہے۔’ روگ ایوی ایٹر کے نام سے ٹوئٹر ہینڈل نے لکھا کہ ‘یہ تو بہت جلد پاکستانی بن گئی۔’ پاکستان عوامی تحریک کے سیکرٹری جنرل خرم نواز گنڈا پور نے اپنی ٹویٹ میں لکھا کہ سادہ اور جذباتی پاکستانی اس خاتون کا پس منظر، عزائم اور الزامات کی حقیقت جانے بغیر اسے چندہ دینا شروع کر دیں گے۔
خرم نواز کی اس ٹویٹ کے جواب میں سنتھیا نے لکھا کہ ‘مجھے افسوس ہے کہ آپ کو ایسا محسوس ہوا۔ میں دولت مند عورت نہیں ہوں اور میں نے پاکستان کے لوگوں کے بارے میں اپنی فلموں کی تیاری پر اپنے خاصے وسائل خرچ کیے ہیں۔ آپ کو میرے ثبوتوں کی حد کا اندازہ نہیں ہے اس لیے برائے مہربانی محدود معلومات کے ساتھ اس معاملے پر بات کرنے سے اجتناب کریں۔’
آشو نامی صارف نے خدشہ ظاہر کیا کہ ‘یہ لاکھوں ڈالر اکٹھے کریں گی اور پھر بھاگ جائیں گی۔’ تاہم ان ٹوئٹس کے بعد سنتھیا نے شرمندگی کا شکار ہوکر کر اپنی چندہ مانگنے کی اپیل ٹوئٹر سے ڈیلیٹ کر دی۔