بجلی بلوں میں فیول ایڈجسٹمنٹ چارجز غیر قانونی قرار
لاہور ہائیکورٹ کی جانب سے فیول ایڈجسٹمنٹ چارجز کو غیر قانونی قرار دینے کا فیصلہ شدید تنقید کی زد میں آگیا ہے ۔ اس فیصلے کو آئی ایم ایف کے ساتھ حکومتی ڈیل کو سبوتاژ کرنے کی ایک سازش قرار دیا جا رہا ہے۔ ناقدین کا کہنا ہے کہ لاہور ہائیکورٹ کا فیصلہ آئی ایم ایف ڈیل کو سبوتاژ کرنے کے لئے کاری وارثابت ہو گا ۔ جسٹس نجفی کے آج کے فیصلہ کی ٹائمنگ محض اتفاق قرار نہیں دی جا سکتی کیونکہ آج ہی حکومت کی طرف سے تکنیکی مذاکرات مکمل کیے گئےتھے اورآئی ایم ایف کی جانب سے سب سے زیادہ پریشر بجلی کے حوالے سے تھا ایسے میں فیول ایڈحسٹمنٹ چارجز کو غیر قانونی قرار دینے کا عدالتی فیصلہ حکومت کیلئے شدید مشکلات پیدا کر سکتا ہے۔عدالتی فیصلے بارے ناقدین کا مزید کہنا ہے کہ پاکستان کی اعلیٰ عدلیہ نے ریکوڈک اور کار کے کے متنازعہ فیصلوں سے کچھ نہیں سیکھا جن کی پاکستان کو بھاری قیمت ادا کرنی پڑی ہے۔
خیال رہے کہ لاہور ہائیکورٹ نے بجلی بلوں میں فیول ایڈجسٹمنٹ چارجز کو غیر قانونی قرار دے دیا ہے۔ فیول ایڈجسٹمنٹ چارجز وصول کرنے کا اقدام مختلف شہریوں کی جانب سے ہائیکورٹ میں چیلنج کیا گیا تھا،جسٹس علی باقر نجفی نے اظہرصدیق سمیت دیگر کی درخواستوں پر محفوظ فیصلہ سنایا،عدالت نے گھریلو صارفین کو 500 یونٹس تک سسبڈی دینے کا حکم دے دیا جبکہ وفاقی حکومت کو متبادل ذرائع سے بجلی پیدا کرنے کی بھی ہدایت کردی۔
درخواست گزار نے مؤقف اختیار کیا تھا کہ وفاقی حکومت نے بلوں میں فیول ایڈجسٹمنٹ کی منظوری دی،بجلی بلز میں فیول ایڈجسٹمنٹ قانونی تقاضوں کے مطابق نہیں، عدالت بجلی کے بلوں میں فیول ایڈجسٹمنٹ کو کالعدم قرار دے۔فیول پرائس ایڈجسٹمنٹ کو سمجھنے کے لیے ایکچوئل فیول کاسٹ ( ایک ماہ میں ایندھن پر آنے والی لاگت) اور ریفرنس فیول کاسٹ سمجھنا ضروری ہے۔ہر مالی سال کے آغاز میں نیشنل الیکٹرک پاور ریگولیٹری اتھارٹی (نیپرا) ایک ریفرنس فیول کاسٹ دیتا ہے۔ یعنی ایک ایسا حوالہ جس سے ہر ماہ ایندھن پر آنے والی کل لاگت کا موازنہ کیا جا سکے۔
ایک مہینے میں بجلی کی پیداوار میں استعمال ہونے والے ایندھن کی کُل لاگت (باسکٹ فیول کاسٹ) دراصل ملک میں توانائی کے مختلف ذرائع میں استعمال ہونے والے ایندھن (جیسے کوئلہ، ایل این جی، فرنس آئل) پر آنے والی لاگت کے اعتبار سے نکالی جاتی ہے۔یوں ہر ماہ کے اختتام پر اس ماہ کی مجموعی فیول کاسٹ کا موازنہ ریفرنس فیول کاسٹ سے کیا جاتا ہے اور اسی حساب سے یہ ’ایڈجسٹمنٹ‘ دو ماہ کے بعد بجلی کے بلوں میں لگ کر آتی ہے۔اگر اُس ماہ مجموعی فیول کاسٹ، ریفرنس کاسٹ سے زیادہ ہو تو آپ کے بل میں ایف پی اے کی مد میں اضافہ ہو گا جبکہ اگر اس ماہ کی مجموعی فیول کاسٹ ریفرنس کاسٹ سے کم ہو تو ایف پی اے کی مد میں کمی آتی ہے۔ اسے ہی فیول پرائس ایڈجسٹمنٹ کہتے ہیں۔
