توہین عدالت کیس، عمران خان کو جواب جمع کرانے کیلئے ایک ہفتے کی مہلت

پی ٹی آئی چیئرمین عمران خان کیخلاف توہین عدالت کیس میں سپریم کورٹ نے عمران خان کو تفصیلی جواب جمع کرانے کیلئے مزید ایک ہفتے کی مہلت دے دی ہے۔عدالت اعظمیٰ میں عمران خان کے خلاف توہین عدالت کی حکومتی درخواست پر سماعت ہوئی تو ان کے وکیل سلمان اکرم راجہ عدالت میں پیش ہوئے اور التواء کی درخواست کی۔

وکیل نے بتایا کہ عمران خان کیساتھ مختصر ملاقات ہوئی ہے، حالات کی وجہ سے مزید وقت دیا جائے، تاہم عمران خان کا جواب تیار ہے،عدالت کہے تو جمع کروا سکتا ہوں۔چیف جسٹس نے کہا کہ جمعرات کو تکلیف دہ مسئلہ ہوا، مزید وقت دینے کی استدعا درست لگی ہے، آپ کو مزید وقت درکار ہے تو عدالت دے سکتی ہے۔

سپریم کورٹ نے عمران خان توہین عدالت کیس کی سماعت آئندہ ہفتے تک ملتوی کرتے ہوئے عمران خان کو تفصیلی جواب کیلئے ایک ہفتہ کا وقت دیدیا۔