سپیکر سندھ اسمبلی سمیت 8 ملزموں کی ضمانت منسوخ

غیر قانونی آمدن سے اثاثے بنانے کے کیس کی سماعت کے دوران سندھ ہائیکورٹ نے سپیکر سندھ اسمبلی آغا سراج درانی سمیت 8 ملزموں کی ضمانت مسترد کر دی۔
سندھ ہائیکورٹ کے جسٹس ندیم اختر اور جسٹس اقبال کلہوڑو نے گذشتہ ہفتے اس حوالے سے فیصلہ محفوظ کیا تھا ۔ عدالت نے آغا سراج درانی اور دیگر کی ضمانت پر فیصلہ جاری کیا ، آغا سراج کی اہلیہ، بیٹا، تین بیٹیاں اور ایک ملزم کی درخواست ضمانت منظور کرلی۔
واضح رہے کہ سپیکر سندھ اسمبلی پر ایک ارب سے زائد غیر قانونی آمدن سے اثاثے بنانے کا الزام ہے۔ ملزموں کے خلاف احتساب عدالت میں ریفرنس زیر سماعت ہے ۔
نیب کی جانب سے ہائیکورٹ کے فیصلے کو سپریم کورٹ میں چیلنج کیا گیا تھا، عدالت عظمیٰ نے ضمانتوں پر دوبارہ دلائل سننے کے لئے معاملہ واپس ہائیکورٹ بجھوایا تھا ۔ چیف جسٹس ہائیکورٹ نے ضمانت پر فیصلے کے لئے دو ججز پر خصوصی بینچ تشکیل دیا تھا۔