مریم کی جان کو سلیکٹرز سے خطرہ ہے
پاکستان مسلم لیگ ن کے قائد اور سابق وزیر اعظم میاں محمد نواز شریف نے کہا ہے کہ مریم نواز کو سلیکٹرز کی طرف سے جان سے مارنے کی دھمکیاں دی جا رہی ہیں اور کہا جا رہا ہے کہ باز نہ آئی توتباہ و برباد کردیں گے،ان کا کہنا تھا کہ مریم نواز کی اللہ حفاظت کرے گا، خدائی لہجے میں دھمکیاں دینے والوں کو تنبیہ کرتا ہوں کہ مریم کو کچھ ہوا تو ذمہ دار جنرل قمر باجوہ،جنرل فیض حمید اور عمران خان ہونگے
انہوں نے اپنے ٹویٹر پر اپنے شدید ردعمل میں کہا کہ 2018ء میں عوامی رائے کو کچل کر ایک نااہل شخص کو ملک پر مسلط کرنااور پاکستان کو تباہی بربادی کے گڑھے میں دھکیلنا کافی نہیں تھا؟سینیٹ الیکشن میں حکومتی امیدوار کی شکست کے فوری بعد جس طرح آپ نے اعتماد کا ووٹ لینے میں اپنے سلیکٹڈ کی دوبارہ مدد کی، کیا وہ کسی سے ڈھکا چھپا ہے؟ ان کا مزید کہنا تھا کہ ڈسکہ کا الیکشن 2018ء کے انتخابات کا ری پلے تھا جس میں دھاندلی کے سارے ریکارڈ توڑ دیے گئے، پھر کہتے ہیں ہمیں سیاست میں نہ گھسیٹا جائے۔
پاکستان کے جمہوری نظام اور اخلاقیات کو پاؤں تلے روندتے ہوئے آپ اس حد تک گر چکے ہیں کہ پہلے آپ نے کراچی میں چادر اور چار دیواری کو پامال کیا، رات کے وقت مریم نواز کے ہوٹل کے کمرے کا دروازہ توڑا اور اب انہیں دھمکی دے رہے ہیں کہ اگر وه باز نہ آئیں تو انہیں SMASH کر دیا جائے گا۔ pic.twitter.com/TEjUS3xHI2
— Nawaz Sharif (@NawazSharifMNS) March 11, 2021
سابق وزیر اعظم نے کہا کہ واہ! پاکستان کے جمہوری نظام اور اخلاقیات کو پاؤں تلے روندتے ہوئے آپ اس حد تک گر چکے ہیں کہ پہلے آپ نے کراچی میں چادر اور چاردیواری کو پامال کیا، رات کے وقت مریم نواز کے کمرے کا دروازہ توڑا، اب انہیں دھمکی دے رہے ہو کہ اگر وہ باز نہ آئیں تو انہیں سمیش کردیا جائے گا۔ان کا کہنا تھا کہ مریم جس جرات اور ایمان کے ساتھ عوام کے حق حکمرانی اور ووٹ کو عزت دو کی جنگ لڑ رہی ہیں، انشاء اللہ ان کی حفاظت اللہ کرے گا۔
سابق وزیراعظم نوازشریف نے نام لے کر عسکری قیادت پر الزام عائد کیا کرتے ہوئے کہا کہ میں خدائی لہجے میں دھمکیاں دینے والوں کو تنبیہ کرنا چاہتا ہوں کہ اگر کسی نے مذموم حرکت کی تو اس کے ذمہ دار عمران خان کے علاوہ جنرل قمر جاوید باجوہ، جنرل فیض حمید اورجنرل عرفان ملک ہونگے ان کا مزید کہنا تھا کہ جو کچھ آپ نے کیا ہے اور کرتے چلے جارہے ہیں یہ سنگین جرم ہے۔جس کا بہت جلد حساب دینا پڑے گا۔
