پی سی بی کا خواتین کرکٹرز کیلئے سینٹرل کنٹریکٹ کا اعلان

پاکستان کرکٹ بورڈ پی سی بی) نے سیزن 21-2020 کے لیے خواتین کرکٹرز کے نئے سینٹرل کنٹریکٹ کا اعلان کردیا ہے۔ پی سی بی سے جاری بیان کے مطابق یکم جولائی 2020 سے نافذ العمل سینٹرل کنٹریکٹ میں اسپنر انعم امین اوربلے باز عمیمہ سہیل سمیت 9 کھلاڑیوں کو شامل کیا گیا ہے۔
نئے کنٹرکٹ میں بین الاقوامی سطح پر شان دار کارکردگی کا مظاہرہ کرنے والی کھلاڑیوں بسمہ معروف، جویریہ خان اور ڈیانا بیگ کی ترقی ہوئی ہے۔ پی سی بی کے مطابق سینٹرل کنٹریکٹ میں شامل تمام کٹیگریوں کے معاوضوں میں اضافہ کردیا گیا ہے۔
کٹیگری اے میں شامل کھلاڑیوں کو ماہانہ آمدن میں 33 فیصد، بی میں 30 جب کہ سی میں 25 فیصد اضافہ کیا گیا ہے۔
پی سی بی نے عمدہ کارکردگی کا مظاہرہ کرنے والی نوجوان کرکٹرز کی کارکردگی کو سراہنے اور انہیں کھیل کی طرف مزید راغب کرنے کے لیے ایک نئی کٹیگری متعارف کروا دی ہے۔ بیان میں کہا گیا ہے کہ ایمرجنگ کٹیگری میں 16 سالہ سیدہ عروب شاہ، 15 سالہ عائشہ نسیم، منیبہ علی، فاطمہ ثنا، کائنات حفیظ، نجیہ علوی، رامین شمیم، صبا نذیراور سعدیہ اقبال شامل ہیں۔ پی سی بی نے ڈومیسٹک مقابلوں میں میچ فیس اورانعامی رقم میں 100 فیصد، ڈومیسٹک ڈیلی الاؤنس میں 50 فیصد اضافے کا اعلان کیا ہے۔
پی سی بی نے بسمہ معروف کو سیزن 2020-21 کے لیے کپتان برقرار رکھنے جبکہ ہیڈ کوچ اقبال امام کے کنٹریکٹ میں توسیع نہ کرنے کا فیصلہ کیا۔ بیان میں کہا گیا ہے کہ اقبال امام کی خدمات کو واپس ہائی پرفارمنس سیٹ اپ کے حوالے کرکے نئے کوچ کے لیے اشتہار دیا جائے گا۔
سنٹرل کنٹریکٹ برائے 21-2020
کٹیگری اے: بسمہ معروف، جویریہ خان
کٹیگری بی: عالیہ ریاض، ڈیانا بیگ اور سدرہ نواز
کٹیگری سی: انعم امین، ناہیدہ خان، عمیمہ سہیل اور ندا ڈار
ایمرجنگ کنٹریکٹ لسٹ: سیدہ عروب شاہ، عائشہ نسیم، منیبہ علی ، فاطمہ ثناء، کائنات حفیظ، نجیہ علوی، رامین شمیم، صباء نذیراور سعدیہ اقبال
چیف سلیکٹر عروج ممتازکی کھلاڑیوں کو مبارکباد
قومی خواتین کرکٹ کی چیف سلیکٹرعروج ممتاز کا کہنا تھا کہ سلیکشن کمیٹی کی جانب سے سینٹرل کنٹریکٹ حاصل کرنے والی کھلاڑیوں کو مبارک باد پیش کرتی ہوں۔
انہوں نے کہا کہ سینٹرل کنٹریکٹ کے اعلان سے قبل سلیکشن کمیٹی نے ایک طویل مشاورت کی، جہاں کھلاڑیوں کی گزشتہ 12 ماہ کے دوران کارکردگی اور فٹنس کا جائزہ لیا گیا۔
عروج ممتاز کا کہنا ہے کہ رواں سال بیٹنگ کے شعبے میں پاکستان کے لیے نمایاں کارکردگی کا مظاہرہ کرنے والی بسمہ معروف اور جویریہ خان کو سنٹرل کنٹریکٹ کی اے کٹیگری میں شامل کیا گیا ہے۔
انہوں نے کہا کہ گزشتہ 12 ماہ میں پاکستان کے باؤلنگ اٹیک کی قیادت کرنے والی فاسٹ باؤلر ڈیانا بیگ کو بھی عمدہ کارکردگی کی بدولت سینٹرل کنٹریکٹ میں ایک درجہ ترقی دے کر بی کٹیگری میں شامل کیا گیا ہے۔
عمیمہ سہیل اور انعم امین کی سنٹرل کنٹریکٹ میں شمولیت پر خوشی کا اظہارکرتے ہوئے انہوں کہا کہ عمیمہ سہیل کی کارکردگی میں تسلسل اور انعم امین کی ٹی ٹوئنٹی کرکٹ میں بہترین باؤلنگ نے انہیں کنٹریکٹ دلانے میں اہم کردارادا کیا ہے۔
ان کا کہنا تھا کہ انٹرنیشنل کرکٹ میں توقعات کے مطابق کارکردگی کا مظاہرہ نہ کرنے کے سبب ندا ڈار کی کٹیگری میں تنزلی ہوئی ہے تاہم وہ ایک اہم رکن ہیں۔
انہوں نے کہا کہ 6 ماہ بعد سینٹرل کنٹریکٹ میں شامل قومی خواتین کھلاڑیوں کی مجموعی کارکردگی کا جائزہ لیا جائے گا۔