پینٹاگون کا چین کی جوہری صلاحیت میں اضافے پر تشویش کا اظہار

امریکہ کے محکمہ دفاع پینٹاگون نے خبردار کیا ہے کہ چین کے میزائل ٹیسٹ اور جوہری ہتھیار واشنگٹن کے لیے خطرے کی گھنٹی ہیں۔

غیر ملکی میڈیا رپورٹس کے مطابق پینٹاگون کی جانب سے جاری رپورٹ میں کہا گیا ہے کہ چین کے جوہری ہتھیاروں کی تعداد جلد 1500 ہوجائے گی۔ چین کے جوہری اثاثے اور بیلسٹک میزائل ٹیسٹ امریکا کے لیے بڑا چیلنج اور خطرے کی گھنٹی ہیں۔

پینٹاگون کی رپورٹ میں مزید کہا گیا ہے کہ گزشتہ سال چین کے بیلسٹک میزائل تجربوں کی تعداد دنیا کے باقی ممالک کے تجربوں کی مجموعی تعداد سے بھی زیادہ تھی۔ چین تیزی سے اپنی فوجی طاقت اور پھیلاؤ میں اضافہ کررہا ہے۔

میڈیا رپورٹس میں بتایا گیا کہ چین عالمی بالا دستی کی شدید خواہش رکھتا ہے تاہم چینی کمیونسٹ پارٹی کے اندرونی مسائل کے باعث اسے چیلنج درپیش ہے۔ چین سے متعلق پینٹاگون کی رپورٹ کانگریس کو پیش کی جائے گی۔