سیلاب متاثرین کو مکمل ریلیف دیں گے، گھرسے کاروبار تک نقصان کا ازالہ ہوگا: علی امین
وزیراعلیٰ خیبرپختونخوا علی امین گنڈاپور نے کہا ہے کہ حالیہ سیلاب سے متاثر ہونے والے شہریوں کے نقصانات کا مکمل ازالہ کیا جائے گا، چاہے وہ گھروں کی تباہی ہو، کاروبار کا نقصان ہو یا مال مویشی کا۔
یہ بات انہوں نے صوبائی کابینہ کے اجلاس کی صدارت کرتے ہوئے کہی، جس میں سیلاب سے شہید ہونے والے افراد کے لیے فاتحہ خوانی اور ان کے درجات کی بلندی کے لیے دعا کی گئی۔ اجلاس میں سیلابی صورتحال، نقصانات، امدادی سرگرمیوں اور بحالی کے اقدامات پر تفصیلی بریفنگ دی گئی۔
وزیراعلیٰ کا کہنا تھا کہ سیلاب سے متاثرہ علاقوں میں ریسکیو آپریشن کا پہلا مرحلہ مکمل کر لیا گیا ہے، جبکہ لاپتا افراد کی تلاش بدستور جاری ہے۔ شہداء کے لواحقین اور زخمیوں کو معاوضوں کی ادائیگی کا عمل بھی شروع کر دیا گیا ہے۔
انہوں نے کہا کہ حکومت سیلاب زدہ علاقوں میں تباہ شدہ املاک، کاروبار، اور لائیو اسٹاک کے نقصانات کا ڈیٹا اکھٹا کر رہی ہے، تاکہ تمام متاثرین کو مؤثر ریلیف فراہم کیا جا سکے۔
وزیراعلیٰ علی امین گنڈاپور نے یقین دہانی کرائی کہ جن افراد کے گھر مکمل طور پر تباہ ہوئے ہیں، حکومت انہیں نئے گھر تعمیر کر کے دے گی۔ اسی طرح جن کے کاروبار متاثر ہوئے ہیں، انہیں مالی پیکیج فراہم کیا جائے گا، اور مویشیوں کے نقصان کا بھی معاوضہ دیا جائے گا۔
انہوں نے بتایا کہ متاثرہ علاقوں میں بحالی اور امداد کے لیے پہلے ہی 3 ارب روپے جاری کیے جا چکے ہیں، جبکہ مزید 2 ارب روپے کی منظوری دی گئی ہے تاکہ بحالی کے عمل کو تیز کیا جا سکے۔
