شہرقائدمیں پھرموسلادھاربارش شروع،نشیبی علاقے زیرآب

شہرقائد کےمختلف علاقوں میں تیز ہواؤں کے ساتھ بارش کا سلسلہ ایک بار پھر شروع ہوگیا۔نشبی علاقوں میں پانی جمع ہوناشروع ہوگیا۔

تفصیلات کے مطابق شہر کے مختلف علاقوں بہادرآباد، پی ای سی ایچ ایس، جمشید روڈ، ٹیپو سلطان روڈ، شاہ فیصل کالونی، ملیر ہالٹ، رفاہ عام، گارڈن، جناح اسپتال اور نواحی علاقے جھمپیر میں تیز ہواؤں کے ساتھ بارش جاری ہے۔

موسمیاتی ماہرین کے مطابق شمالی بحیرۂ عرب کے اوپر دو مون سون سسٹم موجود ہیں، ایک کیٹی بندر کے جنوب مشرق میں اور دوسرا کَچ ریجن پر، جبکہ ایک نمایاں کم دباؤ وسطی بھارت میں موجود ہے۔

ان کے مطابق ان موسمیاتی سسٹمز کے زیرِ اثر آج بھی کراچی سمیت جنوبی اور زیریں سندھ میں گرج چمک کے ساتھ بارش جاری رہے گی اور یہ اسپیل اگلے دو سے تین روز تک سرگرم رہنے کا امکان ہے۔

ڈپٹی ڈائریکٹر محکمہ موسمیات انجم نذیر ضیغم نے بتایا کہ کراچی میں دوپہر سے شروع ہونے والا بارش کا سلسلہ شام 7 بجے تک جاری رہ سکتا ہے۔ ان کے مطابق شہر کے شمال مشرقی حصے میں گرج چمک کے بادل موجود ہیں جبکہ سندھ میں بارشیں 23 اگست تک وقفے وقفے سے جاری رہنے کا امکان ہے۔