کیا بجٹ کے بعد ڈالر 328روپے 48پیسے کا ہو جائے گا؟
بجٹ میں ڈالر کی قیمت 328روپے 48پیسے مقرر کرنےکی شرط پر آئی ایم ایف اور حکومت میں ٹھن گئی۔
آئی ایم ایف اور پاکستان کے درمیان روپے اور ڈالر کی قدر کے تعین کے معاملے میں اختلاف پیدا ہوگیا۔آئی ایم ایف نے اگلے مالی سال کے بجٹ کیلیے ڈالر کے مقابلے میں روپے کی قدر 16 فیصد گراوٹ کے ساتھ 328.4 روپے مقرر کرنے کی تجویز دی تھی، لیکن پاکستان نے اس سے اختلاف کرتے ہوئے 3.5 فیصد گراوٹ کے ساتھ روپے کی قدر 295 روپے مقرر کی ہے۔
واضح رہے کہ ماضی میں اس حوالے سے آئی ایم ایف کے تخمینے غلط ثابت ہوچکے ہیں، آئی ایم ایف نے رواں ماہ جون کیلیے ڈالر کا ریٹ 300 روپے ہونے کا اندازہ لگایا تھا، لیکن اس وقت ڈالر 278.10 روپے پر ٹریڈ کر رہا ہے۔
وزارت منصوبہ بندی کا کہنا ہے کہ بیرونی قرضوں کی ادائیگیوں کی وجہ سے اگلے مالی سال کے دوران روپے پر دباؤ برقرار رہے گا، واضح رہے کہ حکومت کو اگلے مالی سال کے دوران 6 ارب ڈالر کے قرضوں کی ادائیگی کرنی ہے، حکومت کو ورلڈ بینک سے 2.5 ارب ڈالر جبکہ ایشیائی ترقیاتی بینک سے 1.6 سے 1.8 ارب ڈالر ملنے کی امید ہے۔
پنجاب حکومت کا ہتک عزت قانون لاہور ہائی کورٹ میں چیلنج کر دیا گیا
حکومت کا خیال ہے کہ ان قرضوں اور آئی ایم ایف پروگرام کی مدد سے حکومت روپے کی قدر کو قابو کرسکتی ہے، حکومت کیلیے دفاعی بجٹ، فارن ڈیبٹ سروسنگ، غیرممالک میں پاکستانی مشن چلانے کی لاگت اور پبلک سیکٹر ڈیولپمنٹ پروگرام کے اخراجات کیلیے حکومت کا جاری کردہ ریٹ بہت اہم ہے۔
حکومت کو توقع ہے کہ وفاقی منصوبوں کی فنانسنگ کی صورت میں حکومت کو 1.7 ارب ڈالر کے فنڈز مل جائیں گے، تاہم، ڈالر کے ریٹ میں کوئی بھی اتار چڑھاؤ پورے بجٹ کو غیر حقیقی بنا دے گا اور پھر حکومت کو ضمنی گرانٹس کی ضرورت پڑے گی، حکومت نے اگلے مالی سال کیلیے ڈالر کی قیمت 290 روپے تک جانے کا تخمینہ لگایا ہے، جبکہ رواں مالی سال کے دوران ڈالر کی ایوریج قیمت 285 رہی ہے اور جمعے کو انٹر بینک میں ڈالر کا ریٹ 279 روپے تھا۔
