عمران خان کو ہاؤس اریسٹ کی پیشکش نہیں ہوئی،عرفان صدیقی
مسلم لیگ ن کے سینئررہنماعرفان صدیقی نے بانی پی ٹی آئی عمران خان کی ہاؤس اریسٹ کی پیشکش کادعویٰ مسترد کردیا۔
مسلم لیگ (ن) کے سنیئر رہنما سینیٹر عرفان صدیقی نے ایکس پرلکھا کہ امریکی میگزین "ٹائم” میں شائع ہونے والا عمران خان کا مضمون، عالمی سطح پر پاکستان کے چہرے پر کالک تھوپنے کی انتہائی قابل مذمت کوشش ہے۔عمران خان کے مضمون میں حکومت، عدلیہ، مسلح افواج اور تمام دوسرے اداروں پر بے بنیاد الزامات عائد کرتے ہوئے پاکستان کی صورت حال کو ” سیاہ عہد” قرار دیا گیا ہے۔
عرفان صدیقی نے کہا کہ بانی پی ٹی آئی عمران خان کے مضمون میں یہ جھوٹا، غلط اور بے بنیاد دعویٰ بھی کیا گیا ہے کہ مذاکراتی عمل کے دوران انہیں اڈیالہ جیل سے نکال کر ہاؤس اریسٹ کی پیشکش کی گئی تھی۔ کسی بھی مرحلے پر سرے سے ایسی کوئی پیشکش نہیں کی گئی، بہتر ہوگا کہ عمران خان بتا دیں کہ یہ پیشکش کس کی طرف سے؟ کس نے؟ کب ان تک پہنچائی؟
