انڈین خفیہ ایجنسی کا پاکستان میں سیاست دانوں پر حملوں کا منصوبہ
حالیہ پاک بھارت جنگ میں چودھراہٹ کا خواب چکنا چور ہونے کے بعد مودی سرکار نے پاکستان کو عدم استحکام کا شکار کرنے کیلئےحکمت عملی بدلنے کا فیصلہ کر لیا ہے۔ بھارت نے پاکستان مخالف دہشتگرد گروپوں کی پشت پناہی کے ساتھ ساتھ بھارت مخالف نظریات رکھنے والے سیاسی رہنماؤں پر قاتلانہ حملے کرنے کی پلاننگ بھی شروع کر دی ہے ۔ مبصرین کے مطابق پاک بھارت جنگ میں شکست کے بعد مودی سرکار کا علاقائی برتری کا خواب ہمیشہ کے لئے ٹوٹ چکا ہے۔شکست کی وجہ سے مودی سرکار غصے میں پاگل ہو چکی ہے اور اب اپنی ہزیمت کا بدلہ لینے کیلئے مودی سرکار نے پاکستان میں غیر ریاستی عناصر کے ذریعے پاکستان میں دہشتگردانہ کارروائیوں میں تیزی لانے کا فیصلہ کر لیا ہے۔ عالمی مبصرین و دفاعی ماہرین کے مطابق بھارت کی پاکستان، سری لنکا، بنگلہ دیش، نیپال، بھوٹان اور مالدیپ کے اندرونی معاملات میں مداخلت دنیا سے ڈھکی چھپی نہیں۔ حقیقت میں جنوبی ایشیا میں ایک "پولیس مین” کا کردار ادا کرنے کی خواہاں مودی سرکار پڑوسی ممالک سے برابر کی سطح پر تعلقات استوار کرنے کی بجائے "علاقائی بالادستی” کے خواب دیکھ رہی تھی۔ تاہم بنگلہ دیش میں بھارت نواز حکومت کے خاتمے اور پھر حالیہ پاک بھارت جنگ میں بھارت کی ذلت آمیز شکست کو جنوبی ایشیا میں بھارت کے تسلط کے خاتمے سے تعبیر کیا جا رہا ہے۔ بعض دفاعی ماہرین بھارت کی پاکستان کے ہاتھوں "روایتی جنگ” میں ناکامی کے بعد جنوبی ایشیا میں "طاقت کے توازن” کو پاکستان کے حق میں جاتا دیکھ رہے ہیں۔
مغربی میڈیا کے مطابق جنگ کے دوران بھارت کے سرکاری و غیر سرکاری میڈیا نے انتہائی غیر ذمہ دارانہ رپورٹنگ کی اور بھارتی عوام کے اندر جنگی جنون اور اشتعال انگیزی کو بڑھانے کے ساتھ ساتھ اصل حقائق بھی بھارتی عوام سے چھپاتے رہے۔ تاہم حقیقت یہ ہے کہ حالیہ پاک بھارت جنگ میں شکست سے بھارت کا علاقائی برتری کا خواب ہمیشہ کے لئے دفن ہو گیا ہے۔ عالمی دفاعی ماہرین کے مطابق پاکستان نے غیر روایتی ہتھیاروں کے ساتھ ساتھ روایتی ہتھیاروں کے ذریعےانتہائی موثر کارروائی کر کے جنوبی ایشیا میں اپنی واضح عسکری برتری کو ثابت کر دیا ہے۔ یوں روایتی جنگ میں بھی پاکستان نے بھارت کو مکمل شکست سے دو چار کر کے مودی سرکار کے توسیع پسندانہ عزائم کو خاک میں ملا دیا ہے۔
دفاعی ماہرین کے مطابق پاک بھارت جنگ دراصل چینی ساختہ ہتھیاروں اور مغربی ساخت کے ہتھیاروں کا امتحان تھی تاہم اس جنگ میں چینی ساختہ روایتی ہتھیاروں اور بہترین عسکری تربیت کی بدولت پاکستان نے اپنے سے سات گنا بڑی عسکری طاقت کو عبرت ناک شکست سے دوچار کر کے اپنی برتری ثابت کر دی ہے۔دفاعی تجزیہ نگاروں کے مطابق بھارتی افواج بہترین روایتی ہتھیاروں کے باوجود ٹریننگ اور تربیت کے فقدان کی بدولت پاکستان کے ہاتھوں ذلیل و رسوا ہوئی۔ یوں افواج پاکستان اپنی پیشہ وارانہ صلاحیتوں کو دنیا کے سامنے منوانے میں کامیاب رہی۔ تجزیہ کاروں کے مطابق بھارت نے اس جنگ میں روسی اسلحہ اور فرانسیسی رافیل طیاروں اور اسرائیلی ڈرونز کا بھی استعمال کیا۔ تاہم پاکستان کے شارٹ، میڈیم اور لانگ رینج میزائلوں نے اپنے اہداف کو انتہائی کامیابی کے ساتھ نشانہ بنایااور پاکستان جنگ کے ابتدائی مراحل میں ہی بھارت کے چار رافیل طیارے زمین بوس کرنے میں کامیاب رہا۔ سیاسی ماہرین کے مطابق بھارت کو ناصرف عسکری محاذ پر شکست ہوئی بلکہ سفارتی سطح پر بھی بھارت کو تنہائی کا سامنا کرنا پڑا اور ترکیہ آذربائیجان، چین اور ایران نے پاکستان کے مؤقف پر کھل کر ساتھ دیا۔ دفاعی ماہرین کے مطابق حالیہ پاک بھارت جنگ میں شکست کے ساتھ ہی بھارت کا جنوبی ایشیا میں چودھری بننے کی خواہش کا بھی قلع قمع ہو گیا ہے اور جنوبی ایشیا میں بھارت کی بالادستی کا خواب بھی ہمیشہ کے لئے چکنا چور ہو گیا۔
دوسری جانب سفارتی حلقوں کے مطابق پاکستان ایک دفعہ پھر مسئلہ کشمیر کو عالمی سطح پر اجاگر کرنے میں کامیاب ہوا ہے۔ اب ضرورت اس امر کی ہے کہ بھارت پاکستان پر دہشت گردی کے بے بنیادالزامات لگانے کی بجائے مسئلہ کشمیر کو اقوام متحدہ کی قراردادوں کے مطابق حل کرے تاکہ جنوبی ایشیا کو آئندہ بھی روایتی اور غیر روایتی جنگوں سے بچایا جا سکے۔ تاہم مبصرین کے مطابق بھارت اپنی کارستانیوں سے باز آنے پر آمادہ دکھائی نہیں دیتا۔ پاکستان کو عدم استحکام کا شکار کرنے کے لئے بھارت نے اس وقت کئی محاذ کھول رکھے ہیں۔ خاص طور پر اندرون ملک دہشت گردوں کی پشت پناہی کرنا اور بیرون ملک سے بھی غیر ریاستی عناصر کی سر پرستی کرنا اب بھارت کا معمول بن چکا ہے۔عالمی مبصرین کے مطابق بھارت کی بدنامِ زمانہ خفیہ ایجنسی "را” مختلف ممالک میں عالمی دہشت گردی میں بھی ملوث پائی گئی ہے۔ کینیڈا اور امریکہ کی حکومتیں کئی بار ہندوستان کی غیر قانونی اور غیر سفارتی مشکوک سر گرمیوں کا برملا اعلان کر چکی ہیںتاہم بھارتی خفیہ ایجنسی "را” حقیقت میں "موساد” کی طرز پر اپنے مخالفین کو پوری دنیا میں نشانہ بنانے کی حکمت عملی پر عمل پیرا دکھائی دیتی ہے۔مغربی میڈیا کے مطابق "را” ناصرف امریکہ اور برطانیہ میں بلکہ دنیا کے مختلف حصوں میں بھارت مخالف نظریات رکھنے والوں اور خاص طور پر علیحدگی پسند سکھ رہنماؤں کے قتل عام میں براہ راست ملوث پائی گئی ہے۔ مختلف موقع پر پاکستان میں بھی شہریوں کے قتل عام میں "را” کے ملوث ہونے کے واضح ثبوت سامنے آ چکے ہیں۔ بلاشبہ بھارت اب دنیا کی پانچویں بڑی معیشت بن چکا ہے مگر عالمی دہشتگردی میں ملوث ہونے کی وجہ اس کا کردار انتہائی مشکوک ہو چکا ہے۔تاہم عالمی طاقتوں کی جانب سے دہشتگردانہ کارروائیوں کے ثبوت سامنے آنے کے باوجود بھارت کے خلاف کوئی ٹھوس اقدام اٹھانے سے احتراز معنی خیز ہے۔
