پنجاب کی نگران حکومت کا PTIجیل بھرو تحریک پر بڑا فیصلہ
پنجاب کی نگران حکومت نے تحریک انصاف کی جیل بھرو تحریک سے متعلق بڑا فیصلہ کیا ہے، جس کے مطابق جیل بھرو تحریک کے دوران رضاکارانہ گرفتاری دینے والے پی ٹی آئی کارکنوں کو گرفتار نہ کرنے کا فیصلہ کیا گیا ہے۔
پنجاب کی نگراں حکومت کا مشاورتی اجلاس ہوا ہے، جس میں جیل بھرو تحریک کے حوالے سے معاملات اور حکمت عملی پر غور کیا گیا۔
اجلاس کی سربراہی نگراں وزیر اعلیٰ محسن نقوی نے کی جب کہ اس میں صوبائی وزرا،چیف سیکرٹری اور آئی جی پنجاب سمیت دیگر متعلقہ حکام نے شرکت کی۔
اجلاس کے دوران پولیس کو ہدایت کی گئی کہ امن و امان کی صورت حال کو ہر صورت یقینی بنایا جائے، رضاکارانہ گرفتاری دینے والوں کو کسی صورت گرفتار نہ کیا جائے، پی ٹی آئی کے کارکن اور رہنما قانون کے خلاف گئے تو گرفتاری عمل میں لائی جائے۔پنجاب حکومت نے میانوالی اور ڈی جی خان کے جیل حکام کو الرٹ رہنے کی ہدایت کر دی۔
دوسری جانب زمان پارک لاہور میں عمران خان نے جیل بھرو تحریک سے متعلق ویڈیو لنک پر اجلاس کی سربراہی کی، اس موقع پر پارٹی قیادت کو رضاکارانہ گرفتاریاں دینے والوں کی فہرست سے آگاہ کیا گیا، عمران خان نے جیل بھرو تحریک کے لئے پارٹی قیادت کو ہدایات جاری کیں۔
