ہم سب کو یک زبان ہو کر مستعفی ہونا چاہئے

وفاقی وزیر داخلہ شیخ رشید نے کہا ہے کہ ہم سب کو ایک زبان ہو کر اپنے عہدوں سے مستعفی ہوجانا چاہئے، ہمارا ہتھیار پھینکنے کا کوئی ارادہ نہیں ہے، ان چوروں کے خلاف آخری دم تک لڑیں گے، عمران خان صاحب کو کل کہہ چکا ہوں، ابھی بھی کہوں گا کہ آخری آپشن ہمارے پاس یہ ہے کہ ہم استعفیٰ دیدیں۔

شیخ رشید نے کہا کہ گھڑی دو گھڑی کی ہارجیت کا مسئلہ نہیں ہے، اصل مسئلہ یہ ہے کہ ہر کوئی بے نقاب ہوگیا ہے، تمام طاقتیں بے نقاب ہوچکی ہیں۔

انہوں نے کہا کہ مجھے امید ہے ان شا اللہ اچھے فیصلے آئیں گے، شام کو عمران خان خطاب بھی کریں گے، میں 3 مہینے پہلے کہتا تھا کہ استعفیٰ دے دو۔ شیخ رشید نے کہا کہ مجھے پتا تھا کہ مسئلے کیا ہیں جب میں کہتا تھا کہ نئے الیکشن کرادو اسمبلی توڑ دو، میں اس وقت بھی ٹھیک تھا جب میں کہتا تھا کہ ایمرجنسی لگادو، میں اس وقت بھی ٹھیک تھا جب میں کہتا تھا کہ گورنر راج لگادو۔

فرح خان ڈالرز کی ذخیرہ اندوزی میں بھی ملوث نکلی

انہوں نے کہا کہ میں آج بھی کہتا ہوں کہ ہمیں یک زبان ہوکر مستعفیٰ ہوجانا چاہیے اور باہر نکل کر قوم کو بتانا چاہیے کہ ان کے اصل چہرے کیا ہیں، یہ کرائے کے ٹٹو ہیں، یہ وہ سامراجی سنڈیاں ہیں جو اس ملک کی آزاد خارجہ پالیسی کو کھائیں گے، اس کا صرف ایک ہی حل ہے، قوم کو بھی سب سمجھ آچکی ہے۔ قبل ازیں وفاقی وزیر برائے انسانی حقوق شیریں مزاری نے اپنی ایک ٹوئٹ میں کہا کہ ’پارلیمنٹ کی بالادستی کو ختم کرنے کے لیے کل رات ایک عدالتی بغاوت ہوئی جس میں یہاں تک حکم دے دیا گیا کہ قومی اسمبلی کا اجلاس کیسے اور کس وقت منعقد ہونا چاہیے‘۔