معروف گلوکار علی ظفر تنقید کی زد میں کیوں آگئے؟
لاہور میں تین روزہ فیض فیسٹیول میں شرکت کرنے والے بھارتی لکھاری جاوید اختر کی میزبانی کرنے پر پاکستانی گلوکار علی طفر تنقید کی زد میں آ گئے ہیں، جاوید اختر نے فیسٹیول کے دوران ممبئی حملہ آوروں کے پاکستان سے ہونے کے الزامات عائد کیے تھے۔
بھارتی نغمہ نگار جاوید اختر 17 سے 19 فروری کو ہونے والے فیض میلے میں شرکت کے لیے پنجاب کے دارالحکومت لاہور آئے تھے، جاوید اختر نے فیض میلے میں پاکستان کے خلاف ہرزہ سرائی کی تھی اور کہا کہ وہ ممبئی کے رہنے والے ہیں اور انہوں نے وہاں پر حملے کو اپنی آنکھوں سے دیکھا۔جاوید اختر نے پاکستان کا نام لیے بغیر فیسٹیول میں موجود تماشائیوں کو مخاطب کرتے ہوئے کہا تھا کہ ممبئی حملوں کے لوگ اب بھی آپ کے ملک میں گھوم رہے ہیں اور اس بات کو ایک ہندوستانی کا شکوہ سمجھ کر برداشت کریں۔
بھارتی نغمہ نگار اور شاعر کے متنازع بیان پر بھی شائقین نے تالیاں بجا کر انہیں داد دی تھی، جاوید اختر کے بیان پر جہاں عام افراد نے ان پر تنقید کی تھی، وہیں پاکستانی شوبز شخصیات نے بھی انہیں آڑے ہاتھوں لیا تھا اور کہا تھا کہ پاکستانیوں نے بطور مہمان ان کی عزت کی لیکن انہیں عزت راس نہ آئی اور پاکستان کے خلاف ہی الزامات لگائے۔فیسٹیول میں شرکت کے بعد علی ظفر نے جاوید اختر کی میزبانی کے لیے عشائیے کا اہتمام کیا تھا، جس میں متعدد شوبز شخصیات بھی شریک ہوئی تھیں، علی ظفر نے جاوید اختر کی شان میں دیے گئے عشائیے کی ایک ویڈیو اپنے انسٹاگرام پر بھی شیئر کی تھی اور انہوں نے عشائیے کے دوران بھارتی نغمہ نگار کا لکھا گیا گانا ’ایک لڑکی کو دیکھا تو ایسا لگا‘ بھی گایا تھا۔
علی ظفر نے جاوید اختر کے گانے کو ان کے سامنے گانے پر فخر اور خوشی کا اظہار کیا تھا، ان کی جانب سے شیئر کی گئی ویڈیو میں علی ظفر کی اہلیہ عائشہ فضلی کو جاوید اختر کے ساتھ خوشگوار موڈ میں بیٹھا دیکھا جا سکتا ہے جبکہ بھارتی نغمہ نگار کے قدموں تلے معروف شوبز شخصیات کو بھی بیٹھے دیکھا جاسکتا ہے۔پاکستان میں آکر پاکستان کے خلاف الزامات لگانے والے جاوید اختر کی شان میں عشائیے کی تقریب رکھنے پر علی ظفر کو صارفین نے تنقید کا نشانہ بناتے ہوئے ان کے خلاف سخت زبان کا استعمال بھی کیا۔
لوگوں نے ان کے انسٹاگرام پر تبصرے کرنے سمیت ان کی ٹوئٹ کو ری ٹوئٹ کرتے ہوئے انہیں آڑے ہاتھوں لیا اور انہیں شرم دلائی کہ جس شخص نے پاکستان میں آکر پاکستان پر الزامات لگائے، اسی کے شان میں تقریب کا انعقاد کیا گیا۔صارفین نے علی ظفر کو تنقید کا نشانہ بناتے ہوئے لکھا کہ وہ ان کی موسیقی کو پسند کرتے تھے لیکن پاکستان کے خلاف بات کرنے والے شخص کو عزت دینے کے بعد وہ لوگ علی ظفر کو سوشل میڈیا پر ان فالو کر دیں گے۔
اسی طرح بعض لوگوں نے علی ظفر کو طعنے دیئے کہ وہ کچھ بھی کرلیں لیکن انہیں پھر بھی بھارت میں کام نہیں دیا جائے گا، صارفین نے علی ظفر کو یاد دلایا کہ اگر فنکاروں کی کوئی سرحد نہیں ہوتی، ان کا سیاست سے کوئی تعلق نہیں ہوتا تو جاوید اختر نے کیوں سیاست پر بات کرتے ہوئے بھارت کی تعریف اور پاکستان پر الزامات لگائے۔
