پہلی پاکستانی اینی میٹڈ فلم ’’اللہ یار‘‘ ریلیز کیلئے تیار

پاکستان کی تاریخ میں پہلی ایکشن اور تھرلر سے بھرپور اینی میٹڈ فیچر فلم ’’اللہ یار اینڈ دی 100 فلاورز آف گاڈ‘‘(AllarYar and the 100 Flowers of GOD) 2 جون 2023 کو ملک بھر کے سینمائوں سکرین پر دھماکہ مچانے کے لیے تیار ہے۔

یہ اپنی نوعیت کی پہلی منفرد فلم ہوگی جس کو پاکستان میں نمائش کے لیے پیش کیا جا رہا ہے، اس سے قبل کسی اینی میٹڈ فیچر فلم کو اس طرح ریلیز نہیں کیا گیا ہے۔

یہ فلم سائنس فکشن اور ایڈونچر پر مبنی پاکستانی تھری ڈی فلم ہے جسے تھرڈ ورلڈ اسٹوڈیو اسلام آباد کی پروڈکشن میں تخلیق کیا گیا ہے، یہ اینی میٹڈ فلم اللہ یار اینڈ دی لیجنڈ آف مارخور کا سیکوئل ہے جو 2018 میں ریلیز ہوئی تھی۔

فلم کی کہانی پاکستان کے شمالی علاقہ جات سے تعلق رکھنے والے ایک نوجوان لڑکے اللہ یار کے گرد گھومتی ہے، فلم میں موسمیاتی تبدیلی، قابل تجدید توانائی، درختوں اور جنگلات کی اہمیت جیسے موضوعات شامل ہیں۔

اس کے علاوہ فلم میں سماجی عدم مساوات، ناانصافی، دوستی اور اتحاد کی قدر جیسے دیگر اہم مسائل کو یکساں طور پر ناظرین کے لیے پیش کیا گیا ہے، اینی میٹڈ فلم کے کرداروں کی وائس اوور کاسٹ میں معروف اداکار شامل ہیں جن میں ہمایوں سعید، علی ظفر، اقرا عزیز، میرا، بشریٰ انصاری، نادیہ جمیل، انعم زیدی، اذلان عزیر اور اظفر جعفری، علی نور، صنم ماروی اور گریہن بینڈ نے اس فلم میں اپنی آواز کا جادو جگایا ہے۔

فلم اللہ یار کے مصنف، ہدایت کار اور پروڈیوسر عزیر ظہیر خان نے بتایا کہ ہم نے اس فلم میں تفریح اور کہانی سے لے کر پروڈکشن کے معیار پر بہت محنت کی ہے، ہمیں اُمید ہے کہ شائقین اس اینی میٹڈ فن کو ہماری پچھلی فلم سے زیادہ پسند کریں گے۔

فلم کے بارے میں اللہ یار کے ایگزیکٹو پروڈیوسر اور ڈسٹری بیوٹر ندیم مانڈوی والا نے کہا کہ ’ہم مانڈوی والا انٹرٹینمنٹ میں ہمیشہ ایسی فلمز ناظرین کے لیے پیش کرتے ہیں جو منفرد ہوں اور سینما سے محبت کرنے والوں کے لیے ایک مخصوص تفریح فراہم کرتی ہوں۔

انہوں نے بتایا کہ یہ ہمارے لیے فخر کی بات ہے کہ مانڈوی والا انٹرٹینمنٹ پاکستان کی پہلی تھری ڈی فلم کی ڈسٹری بیوٹ اور ریلیز کر رہی ہے۔

شبانہ اعظمی کی پاک بھارت تعلقات میں بہتری کیلئے انوکھی تجویز

Related Articles

Back to top button