بھارتی گلوکار سونو نگم کو سیلفی سے انکار مہنگا کیوں پڑ گیا؟
معروف بھارتی گلوکار سونو نگم کو انتہاپسند جماعت شیو سینا کے رکن اسمبلی کے بیٹے کو سیلفی کے لیے انکار مہنگا پڑ گیا، سیلفی کیلئے وقت نہ دینے پر نوجوان نے سونو نگم کو سٹیج سے دھکا دے دیا جس سے وہ بری طرح زخمی ہوگئے۔
این ڈی ٹی وی کے مطابق سونو نگم پر شیو سینا کے رکن ریاستی اسمبلی پرکاش پھترپیکر کے بیٹے اور اس کے ساتھیوں نے اس وقت حملہ کیا جب گلوکار کنسرٹ ختم کرکے جا رہے تھے۔رپورٹ میں بتایا گیا کہ ریاستی اسمبلی مہاراشٹر کے رکن کے بیٹے نے پہلے سونو نگم کی ٹیم کے ارکان کو گلوکار کے ساتھ سیلفی بنوانے کی درخواست کی اور انکار پر انہوں نے ساتھیوں سمیت گلوکار کی ٹیم پر حملہ کردیا،رپورٹ میں بتایا گیا کہ رکن اسمبلی کے بیٹے اور ان کے دوستوں کے حملے میں سونو نگم کی ٹیم کے رکن سخت زخمی ہوگئے جب کہ دھکم پیل میں سونو نگم بھی گر گئے اور انہیں بھی معمولی چوٹیں لگیں۔
بعد ازاں گلوکار کی ٹیم کے زخمی شخص کو ہسپتال میں طبی امداد دے کر فارغ کر دیا گیا جبکہ سونو نگم نے حملے کا مقدمہ بھی دائر کروا دیا، پولیس نے بھی سونو نگم اور ان کی ٹیم پر حملے کی تصدیق کی اور بتایا کہ جھگڑا گلوکار کے ساتھ سیلفی کھچوانے کی اجازت نہ دینے پر ہوا،پولیس کے مطابق جھگڑے میں کوئی بھی شدید زخمی نہیں ہوا اور کوئی بھی بڑا حادثہ رپورٹ نہیں ہوا، تاہم معاملے کی مزید تحقیق کی جا رہی ہے،
دوسری جانب سونو نگم کے میوزک کنسرٹ کا اہتمام کرنے والے افراد نے بھی گلوکار سے حملے پر معافی مانگتے ہوئے ان کے ساتھ اظہار ہمدردی کیا ہے۔سونو نگم پر شیو سینا کے رکن اسمبلی کے بیٹے کے حملے کی ویڈیو سوشل میڈیا پر وائرل ہوگئی اور لوگوں نے شیو سینا کی قیادت کو آڑے ہاتھوں لیا اور سخت تنقید کا نشانہ بنایا ہے۔
