2021 میں پاکستانی شوبز کے بڑے تنازعات کونسے تھے؟

شعیب ملک کا عائشہ عمر کے ساتھ بولڈ فوٹو شوٹ ہو یا علی عظمت کی نورجہاں کی شان میں گستاخی، یہ تمام متنازعہ موضوعات 2021 کے دوران پاکستانی انٹرٹینمنٹ کی دنیا میں زیر بحث رہے اور خبروں کی زینت بنے۔
معروف سپر ماڈل اور اداکار شہروز سبزواری کی دوسری اہلیہ صدف کنول نے ایک ایسا بیان دیا جس کے بعد سوشل میڈیا پر ان پر تنقید شروع ہو گئی۔

انہوں نے کہا تھا کہ ان کا کلچر انہیں سکھاتا ہے کہ وہ اپنے شوہر کی دکو جان سے خدمت کریں اور اسے پتہ ہونا چاہیئے کہ اس کے جوتے کہاں رکھے ہیں۔ اس بیان پر نہ صرف ان کا ٹرینڈ بنا بلکہ کئی سوشل میڈیا اکاؤنٹس پر ان کے اور ان کے شوہر کی کافی میمز بھی بنے۔ کئی خواتین نے تنقید کرتے ہوئے کہا کہ صدف کنول آج کی پاکستانی عورت کی ترجمانی نہیں کرتیں۔ تاہم صدف کنول اپنے موقف پر قائم رہیں اور بار بار اسے دہرایا۔لیکن جتنا مذاق مارننگ شو ہوسٹ ندا یاسر کا اڑایا گیا، اس کی مثال ملنا مشکل ہے۔

ہوا یوں کہ ندا یاسر کے مارننگ شو کی ایک پرانی کلپ سوشل میڈیا پر وائرل ہوئی جس میں انہوں نے فارمولا ون کار بنانے والے لڑکوں سے اس کار کا فارمولا پوچھ لیا جس پر سوشل میڈیا صارفین کے علاوہ ان کے شوہر یاسر نے بھی انکا کافی مذاق اڑایا۔

سال 2021 میں گلوکار علی عظمت کو ملکہ ترنم میڈم نورجہاں کے بارے میں لوز بات کرنا مہنگا پڑ گیا۔ علی عظمت نے ایک ٹاک شو میں میڈم نورجہاں کی ڈریسنگ اور ان کے گانے کے اسٹائل کا مذاق اڑایا جس پر دنیا بھر میں میڈم کے مداحوں نے انہیں سوشل میڈیا پر آڑے ہاتھوں لیا۔ اس گفتگو کے بعد علی عظمت کو شوبز برادری سے بھی حمایت نہ ملی، بالآخر انہوں نے ایک ویڈیو کے ذریعے میڈم نورجہاں کے گھر والوں اور ان کے مداحوں سے معافی مانگی اور کہا کہ میں تو بچپن سے میڈم نورجہاں کا فین رہا ہوں اور میری گفتگو کا غلط مطلب لیا گیا۔

سلمان خان فیروزہ بریسلٹ کیوں پہنتے ہیں؟

پچھلے برس مشہور ڈرامہ ‘ہم کہاں کے سچے تھے’ میں زبردست پرفارمنس دینے والے عثمان مختار بھی خبروں کی زینت بنے رہے۔ ایک سوشل میڈیا پوسٹ کے ذریعے انہوں نے ایک ساتھی خاتون فنکارہ پر ہراسانی کا الزام عائد کیا جس کے بعد ان کی حمایت میں سوشل میڈیا پر ٹرینڈ بھی چلا۔ عثمان مختار نے دعویٰ کیا تھا کہ ان کی ایک ساتھی فنکارہ انہیں سوشل میڈیا پر ایک برس سے زائد عرصے سے بلیک میل، ہراساں اور تنگ کر رہی ہیں اور جب ان کے پاس کوئی راستہ نہیں بچا تو انہوں نے معاملہ ایف آئی اے کے سپرد کر دیا۔

دوسری جانب کرکٹر شعیب ملک اور اداکارہ عائشہ عمر کے ایک میگزین کے لیے ہوئے بولڈ فوٹوشوٹ پر لوگوں نے ناپسندیدگی کا اظہار کیا۔شعیب ملک اور عائشہ عمر کا یہ فوٹوشوٹ ایک میگزین کے لیے کرایا گیا جس کی تصاویر سوشل میڈیا پر وائرل ہوتے ہی دونوں کے حوالے سے خبریں گردش کرنے لگیں۔
سوشل میڈیا پر تو کوئی روک تھام کرنے والا نہیں لیکن ٹی وی پر یہ کام پیمرا کے سپرد ہے جنہیں ڈراموں میں ہیرو اور ہیروئن کا گلے لگنا تو برا لگتا ہے۔

موسیقی کی دنیا میں بھی ہچھلے سال بہت کچھ ہوا لیکن معروف گلوکار اور سیاست دان ابرار الحق اپنی ایک حرکت سے کافی تنقید کا نشانہ بنے۔ ایک تقریب میں انہوں نے پہلے بچوں کے پسندیدہ گانے ‘بے بی شارک’ کا مذاق اڑایا اور پھر چند ہی دنوں بعد ‘بیوی شک کرتی ہے’ کے نام سے ایک گانا ریلیز کیا جو سوشل میڈیا صارفین کے مطابق کسی اور گانے کی نہیں، ‘بے بی شارک’ ہی کی نقل تھی۔

پچھلے برس ایک اور تنازعہ اداکار نعمان اعجاز کے ٹاک شو ‘جی سرکار’ میں گفتگو کی وجہ سے کھڑا ہوا۔ اس شو میں سابق ٹیسٹ کرکٹر عبد الرزاق نے ویمن کرکٹ ٹیم کی کھلاڑی ندا ڈار کے حلیے کا مذاق اڑایا۔ جسے نہ صرف ناظرین نے بلکہ پیمرا نے بھی ناپسند لیا۔

راولپنڈی ایکسپریس شعیب اختر کا شمار پاکستان کے نامور کرکٹرز میں ہوتا ہے۔ 1990 کی دہائی سے لے کر ورلڈ کپ 2011 کے دوران انہوں نے پاکستان کی کئی فتوحات میں کردار ادا کیا۔شعیب اختر سے سرکاری ٹی وی پر ایک اینکر کی آن ایئر بدتمیزی اور انہیں سیٹ سے چلے جانے کا کہنا سوشل میڈیا پر کئی دن تک زیرِ بحث رہنے والا موضوع تھا۔

شعیب اختر نے اس رویے کے بعد نہ صرف سرکاری ٹی وی سے استعفیٰ دیا بلکہ سوشل میڈیا کے ذریعے اپنا مؤقف بھی پیش کیا۔ حکومتی شخصیات کی مداخلت کے بعد ٹی وی شو کے میزبان ڈاکٹر نعمان نیاز اور شعیب اختر کے درمیان صلح تو ہو گئی لیکن شعیب اختر کے مداحوں نے تاحال ڈاکٹر نعمان نیاز کو انکی پاڈا گیری کی وجہ سے معاف نہیں کیا۔