پنجاب حکومت کی کارکردگی پر بات ہوگی تو مریم نواز جواب دیں گی : رانا ثناء اللہ
وزیراعظم کے مشیر برائے سیاسی امور رانا ثناء اللہ نے کہا ہے کہ پنجاب حکومت کی کارکردگی پر بات ہوگی تو وزیر اعلیٰ پنجاب مریم نواز کی ذمے داری ہے کہ وہ اس کا جواب دیں۔
مرکزی رہنما مسلم لیگ ن سینیٹر رانا ثناء اللہ نے کہا کہ پیپلزپارٹی اور ن لیگ اکثر معاملات میں ایک دوسرے کے ساتھ تعاون کرتےہیں۔پیپلزپارٹی کے ساتھ ہمارا کئی معاملات پر اختلاف بھی رہا ہےاور دونوں جماعتوں نے اکٹھے جدوجہد بھی کی ہے۔
سینیٹر رانا ثنا اللہ نے کہا کہ چیئرمین پیپلز پارٹی بلاول بھٹو نے جو پریس کانفرنس میں گفتگو کی اس پر ہمیں اعتراض ہے۔
رہنما مسلم لیگ ن کا کہنا تھاکہ بلاول بھٹو زرداری جو تجاویز دے رہے ہیں،اس سے لگا وہ کہہ رہےہیں کہ شاید ہم کام ٹھیک نہیں کر رہے، ان کی گفتگو وزیر اعلی پنجاب مریم نواز کو ناگوار گزری ہے۔
سینیٹر رانا ثنا اللہ نے کہا کہ پنجاب حکومت کی کارکردگی پر بات ہوگی تو مریم نواز کی ذمے داری ہے کہ وہ اس کا جواب دیں۔
انہوں نےکہاکہ جس دن آصف علی زرداری،شہباز شریف یا نواز شریف کی سطح پر بات ہوگی،ُس دن یہ سب ختم ہوجائے گا۔
