بلاول بھٹو کا پیغام ہے کہ ہم آیت نور کی فیملی کے ساتھ ہیں، روبینہ خالد

چیئرپرسن بینظیر انکم سپورٹ پروگرام (بی آئی ایس پی) روبینہ خالد نے کہا ہے کہ بلاول بھٹو کا پیغام ہے کہ وہ اور پاکستان پیپلز پارٹی آیت نور کے اہل خانہ کے ساتھ کھڑے ہیں۔

روبینہ خالد نے آیت نور کے گھر جا کر مقتول بچی کے والد اور دیگر اہل خانہ سے ملاقات کی اور ان سے دلی تعزیت کا اظہار کیا۔

بچی سے زیادتی اور قتل کی شدید مذمت

روبینہ خالد نے آیت نور کے ساتھ پیش آنے والے افسوسناک واقعے پر گہرے دکھ اور افسوس کا اظہار کرتے ہوئے بچی سے زیادتی اور اس کے قتل کی شدید مذمت کی۔

انہوں نے کہا کہ ملک میں آئے روز بچیوں کے ساتھ زیادتی کے واقعات سامنے آ رہے ہیں، جن کی روک تھام کے لیے مؤثر اور سخت اقدامات کی ضرورت ہے۔

متاثرہ خاندان کو قانونی اور عدالتی مدد فراہم کرنے کا اعلان

چیئرپرسن بی آئی ایس پی کا کہنا تھا کہ قانون میں موجود سقم کی وجہ سے بعض اوقات ملزمان فائدہ اٹھانے میں کامیاب ہو جاتے ہیں۔

انہوں نے یقین دہانی کرائی کہ آیت نور کے اہل خانہ کو ہر ممکن قانونی اور عدالتی کارروائی میں مدد فراہم کی جائے گی تاکہ متاثرہ خاندان کو انصاف مل سکے۔

آیت نور کی لاش 15 روز بعد کنویں سے ملی

واضح رہے کہ خیبر پختونخوا کے ضلع ہری پور سے تعلق رکھنے والی 5 سالہ آیت نور لاپتہ ہوگئی تھی۔

پولیس کے مطابق بچی کو زیادتی کا نشانہ بنانے کے بعد قتل کیا گیا، جبکہ اس کی لاش لاپتہ ہونے کے 15 روز بعد ایک کنویں سے برآمد ہوئی۔

اہل خانہ کے ساتھ اظہارِ یکجہتی

روبینہ خالد نے کہا کہ بلاول بھٹو کی جانب سے آیت نور کے خاندان کے ساتھ مکمل اظہارِ یکجہتی کیا گیا ہے اور متاثرہ خاندان کو قانونی کارروائی کے دوران تعاون فراہم کرنے کی یقین دہانی کرائی گئی ہے۔