وزیر اعظم نے ادویات کی قیمتوں میں اضافے کی سمری مسترد کر دی

وزیراعظم نے وفاقی کابینہ کے اجلاس میں ادویات کی قیمتوں میں اضافے کی سمری مسترد کر دی۔

وزیراعظم شہباز شریف کی زیر صدارت وفاقی کابینہ کا اجلاس منعقد ہوا جس میں سرکاری کوٹہ میں حجاج کی بکنگ کی انکوائری پیش کی گئی۔

کابینہ اجلاس میں حکومتی کوٹے پر حجاج کی اوور بکنگ کے معاملے کی انکوائری رپورٹ میں بتایا گیا کہ اوور بکنگ کے معاملے میں ری کنسیلیشن کے مسائل تھے اور کسی قسم کی بدنیتی کے ثبوت نہیں ملے۔ جن بینکوں کی جانب سے حجاج کی حکومتی کوٹے پر اوور بکنگ کی گئی تھی، ان بینکوں کی طرف سے حجاج کو معاوضے کی واپس رقم ادا کردی گئی ہے۔

اجلاس میں وزیراعظم نے وزراتِ خزانہ اوراسٹیٹ بینک آف پاکستان کو یہ ہدایت کی کہ ان بینکوں سے یہ ضرور پوچھا جائے کہ اُنہوں نے اس معاملے میں لاپرواہی سے کام کیوں لیا۔

اجلاس کے دوران وفاقی کابینہ نے وزارتِ نیشنل ہیلتھ سروسز، ریگولیشنز اینڈ کوارڈینیشن کی جانب سے 10 ادویات پر ریٹیل پرائس بڑھانے کی سمری مسترد کردی، اس حوالے سے وزیراعظم نے کہا کہ میں ادویات کی قیمتوں میں اضافے کی قطعی حمایت نہیں کرتا۔

وفاقی کابینہ نے وزارتِ سائنس وٹیکنالوجی کی سفارش پر بجلی سے چلنے والے پنکھوں کے لیے انرجی پرفارمنس سٹینڈرڈ کی معیاد میں 30 جون 2023 تک توسیع کی منظوری دے دی تاہم وزیراعظم نے وزراتِ سائنس و ٹیکنالوجی کو ہدایت کی کہ اس حوالے سے 30 جون 2023 سے پہلے بہتر کوالٹی پر لانے کی بھرپور کوشش کی جائے۔

کابینہ اجلاس کے دوران وزیراعظم نے ای سی سی کے فیصلوں، نجکاری کمیٹی کے فیصلوں اور کابینہ کی قانون ساز کمیٹی کے گزشتہ اجلاس کے فیصلوں کی منظوری دی جب کہ دس ادویات کی ریٹیل قیمتوں میں اضافے کی سمری مسترد کردی۔