سپریم کورٹ: دوران سماعت چیف جسٹس اور جسٹس منیب میں ناخوشگوار جملوں کا تبادلہ
چیف جسٹس قاضی فائر عیسٰی کی سربراہی میں سپریم کورٹ میں سنی اتحاد کونسل کی مخصوص نشستوں کے کیس پر سماعت دوران چیف جسٹس قاضی فائز عیسیٰ اور جسٹس منیب اختر کے درمیان ناخوشگوار جملوں کا تبادلہ بھی ہوا۔
دوران سماعت چیف جسٹس اور جسٹس منیب اختر کے درمیان جملوں کا تبادلہ بھی ہوا۔ جسٹس قاضی فائز عیسیٰ نے کہا کہ ہم آپ کو سننے بیٹھے ہیں، ہم اپنا فیصلہ کرلیں گے، میں ایک بار ایک عدالت پیش ہوا تو کہا تھا آپ اگر فیصلہ کر چکے ہیں تو میں اپنا کیس ختم کرتا ہوں، آپ اپنے دلائل نہیں دیں گے تو مجھے کیا سمجھ آئے گی کہ آپ کی جانب سے کیا لکھنا ہے، میرا خیال ہے فیصل صدیقی صاحب ہم آپ کو سننے بیٹھے ہیں۔ جس پر جسٹس منیب اختر نے کہا یہ غیر ذمہ دارانہ بیان ہے، فل کورٹ میں ہر جج کو سوال پوچھنے کا حق ہے، جس پر چیف جسٹس نے کہا فیصل صاحب آگے بڑھیں میں نے ہلکے پھلکے انداز میں بات کی تھی، جسٹس منیب اختر بولے اس قسم کا غیر ذمہ دارانہ بیان تسلیم نہیں کیا جا سکتا۔
وزیر اعظم نے قومی اقتصادی کونسل تشکیل دے دی
سپریم کورٹ میں سنی اتحاد کونسل کی مخصوص نشستوں کے کیس کی سماعت کے دوران جسٹس منیب اختر نے ریمارکس دیے نوٹی فکیشن کے مطابق سنی اتحاد کونسل نے انتخابات میں کوئی نشست نہیں جیتی تھی، الیکشن کمیشن کے احکامات میں کوئی منطق نہیں لگتی، الیکشن کمیشن ایک جانب کہتا ہے سنی اتحاد کونسل الیکشن نہیں لڑی، ساتھ ہی پارلیمانی جماعت بھی مان رہا ہے، اگر پارلیمانی جماعت قرار دینے کے پیچھے تحریک انصاف کی شمولیت ہے تو پہلے ہو چکی تھی۔ جسٹس اطہر من اللہ کا کہنا تھا اگر سنی اتحاد کونسل سے غلطی ہوئی تھی تو الیکشن کمیشن تصحیح کرسکتا تھا جب کہ جسٹس جمال مندوخیل نے کہا کہ اگر ایسا ہو جائے تو نشستیں پی ٹی آئی کو ملیں گی، سنی اتحاد کونسل کو نہیں۔ جسٹس اطہر من اللہ نے مزید کہا عوام کو کبھی بھی انتخابی عمل سے الگ نہیں کیا جاسکتا جب کہ جسٹس جمال مندوخیل کا کہا کہ عوام نے کسی آزاد کو نہیں بلکہ سیاسی جماعت کے نامزد افراد کو ووٹ دیے تھے۔
