پیپلزپارٹی نے حکومت کیخلاف اِن ہاؤس تبدیلی کی حمایت کر دی
پیپلزپارٹی کے شریک چیئرمین اور سابق صدر آصف علی زرداری نے حکومت کے خلاف ان ہائوس تبدیلی کی حمایت کا اعلان کر دیا، جبکہ پی ڈی ایم کا حصہ بننے کے امکان کو مسترد کر دیا گیا۔
احتساب عدالت میں سابق صدر آصف زرداری کی نیویارک پراپرٹی کیس میں درخواست ضمانت پر سماعت ہوئی، آصف زرداری عدالت میں پیش ہوئے، نیب پراسیکیوٹر نے درخواست مسترد کرنے کی استدعا کی۔
عدالت نے پیپلزپارٹی کے شریک چیئرمین کو نیب کی انکوائری میں ریلیف دیتے ہوئے نیب کی استدعا مسترد کر دی، نیو یارک پراپرٹی کیس میں آصف زرداری کی ضمانت قبل از گرفتاری کی درخواست منظور کر لی گئی۔
آصف زرداری نے اس موقع پر میڈیا سے گفتگو کرتے ہوئے کہا کہ انشا اللہ بہتر ہوگا، میں تو چاہتا ہوں کہ یہ حکومت پہلے دن ہی چلی جائے، یہ نا معقول لوگ ہیں ان سے حکومت نہیں چلائی جائے گی، اور اب تاریخ نے بھی یہ بات ثابت کر دی، جو عوام کے حالات ہیں ان میں حکومت سے کچھ نہیں ہو سکتا۔
نواز کی جھوٹی ضمانت پر شہباز کیخلاف عدالت سے رجوع کا فیصلہ
پیپلز پارٹی کے دوبارہ پی ڈی ایم کا حصہ بننے کے سوال پر آصف زرداری نے جواب دیا کہ مجھے نہیں معلوم لیکن میں ایسا نہیں سمجھتا ہوں، مولانا فضل الرحمن پہلے بھی مارچ کرتے رہے ہیں۔
گزشتہ روز مسلم لیگ ن کے قائد نواز شریف نے اِن ہاؤس تبدیلی کے لیے گرین سگنل دیا تھا جس کے بعد پارٹی صدر شہباز شریف نے ملاقاتوں کا سلسلہ شروع کر دیا ہے۔
