وزیراعظم کی چینی ہم منصب سے ملاقات، متعدد معاہدوں اور ایکشن پلان پر دستخط
وزیراعظم شہباز شریف نے چین میں اپنے چینی ہم منصب لی چیانگ سے ملاقات کے دوران پاک چین تعلقات کو نئی بلندیوں تک لے جانے کے عزم کا اظہار کیا اور شنگھائی تعاون تنظیم (SCO) کے حالیہ سربراہی اجلاس کی کامیاب میزبانی پر چین کو مبارکباد دی۔
وزیراعظم آفس سے جاری اعلامیے کے مطابق ملاقات میں دونوں رہنماؤں نے سی پیک کے تحت ایم ایل ون، قراقرم ہائی وے کی ری الائمنٹ اور گوادر پورٹ کے جلد از جلد نفاذ پر زور دیا، جبکہ سی پیک فیز 2 میں شامل پانچ نئے اقتصادی راہداری منصوبوں پر تیزی سے پیش رفت پر بھی اتفاق کیا گیا۔
اعلامیے کے مطابق پاکستان جلد چینی کیپیٹل مارکیٹ میں پانڈا بانڈز جاری کرے گا۔
بی ٹو بی انویسٹمنٹ کانفرنس میں 300 پاکستانی اور 500 چینی کمپنیوں نے شرکت کی۔
سرمایہ کاری کے لیے زراعت، معدنیات، ٹیکسٹائل، صنعت اور آئی ٹی کو ترجیحی شعبے قرار دیا گیا۔
وزیراعظم شہباز شریف نے چین کے ترقیاتی ماڈل کو سراہتے ہوئے کہا کہ پاکستان چین کے تجربے سے سیکھنا چاہتا ہے۔ انہوں نے پاکستان کی خودمختاری اور ترقی میں چین کی مسلسل حمایت پر شکریہ ادا کیا اور صدر شی جن پنگ کے عالمی اقدامات کی بھرپور حمایت کا اعادہ کیا۔
ملاقات میں جوائنٹ ایکشن پلان 2024-29 پر دستخط کو دو طرفہ تعلقات میں اہم سنگِ میل قرار دیا گیا، جبکہ سائنس و ٹیکنالوجی، آئی ٹی، میڈیا اور زراعت سمیت مختلف شعبوں میں تعاون بڑھانے پر بھی اتفاق ہوا۔
دونوں وزرائے اعظم نے اس بات پر بھی اتفاق کیا کہ 2026 میں پاک چین سفارتی تعلقات کی 75ویں سالگرہ شایانِ شان انداز میں منائی جائے گی۔
