ممتاز دانشور الطاف حسن قریشی انتقال کرگئے

پاکستان کے ممتاز دانشور اور ماہنامہ ’اردو ڈائجسٹ‘ کے مدیر اعلیٰ الطاف حسن قریشی انتقال کرگئے۔

مرحوم کی نماز جنازہ اتوار 17 مئی کو نماز ظہر کے بعد ڈیڑھ بجے جامعہ اشرفیہ، فیروز پور روڈ لاہور میں ادا کی جائے گی۔

واضح رہے کہ نومبر 2024 میں الطاف حسن قریشی کی اہلیہ کا انتقال ہوا تھا، جن کی نماز جنازہ لاہور میں ادا کی گئی تھی۔

الطاف حسن قریشی نے اپنے رفقا کے ساتھ مل کر ’اردو ڈائجسٹ‘ کی بنیاد رکھی، جس نے پاکستان میں معلوماتی، تجزیاتی اور بیانیہ صحافت کے فروغ میں نمایاں کردار ادا کیا۔ اس جریدے نے نہ صرف قارئین میں شعور اجاگر کیا بلکہ صحافتی معیار کو بھی ایک نئی سمت دی۔

انہوں نے تحریکِ پاکستان، قومی سیاست اور تاریخ جیسے اہم موضوعات پر گراں قدر تصانیف بھی تحریر کیں۔ ان کی معروف کتابوں میں ’مشرقی پاکستان ٹوٹا ہوا تارا‘ اور قائداعظم کے ساتھیوں پر مبنی تاریخی انٹرویوز شامل ہیں۔

الطاف حسن قریشی ایک منجھے ہوئے سیاسی مبصر کے طور پر بھی جانے جاتے تھے، جن کی ملکی حالات پر گہری نظر تھی۔