مسک کا دورہ ملتوی ہونے پر بھارت کو کتنے ارب ڈالر کا نقصان ہوا؟

دنیا کی امیر ترین شخصیات میں شمار ہونے والے ایلون مسک نے اپنا حالیہ دورہ بھارت منسوخ کر دیا ہے جس کو رواں برس کے اختتام تک شیڈول کیا گیا ہے، اس دورہ کی منسوخی سے بھارت کو اربوں ڈالر نقصان کا خدشہ ظاہر کیا گیا ہے۔’’رائٹرز‘‘ کے مطابق ایلون مسک نے ایکس پر بیان جاری کرتے ہوئے کہا کہ وہ اپنی کمپنی ٹیسلا میں بھاری ذمہ داریوں کی وجہ سے بھارت کا دورہ ملتوی کر رہے ہیں تاہم ان کا کہنا تھا کہ اس سال کے آخر میں وہ اپنا دورہ دوبارہ شیڈول کریں گے۔ایلون مسک وزیر اعظم نریندر مودی سے ملاقات کرنے اور بھارتی مارکیٹ میں اپنے بڑے منصوبوں کا اعلان کرنے کا ارادہ رکھتے ہیں، اسی سلسلے میں وہ 21 اور 22 اپریل کو بھارت کا دورہ کرنے والے تھے۔ان کے دورے کو جنوبی ایشیائی مارکیٹ میں ٹیسلا کی انٹری کے طور پر دیکھا جا رہا تھا۔رپورٹ کے مطابق ہو سکتا ہے کہ ایلون مسک کا بھارت کا دورہ ایسے موقع پر شیڈول ہوا تھا جب ٹیسلا کے سٹاک کی قیمتوں میں کمی واقع ہو رہی تھی اور کمپنی کی جانب سے 15 اپریل کو دنیا بھر میں اپنے 10فیصد سے زیادہ ملازمین کو فارغ کرنے کے بارے میں حالیہ خبریں سامنے آئی تھیں۔دوسری جانب ٹیسلا پبلک پالیسی کے ایگزیکٹو روہن پٹیل، جو مبینہ طور پر بھارت کی مارکیٹ میں ٹیسلا کی انٹری کے منصوبوں کی قیادت کرنے والوں میں شامل تھے، نے اس ہفتے استعفیٰ دیدیا، ایلون مسک کا بھارت کا دورہ ایسے موقع پر ملتوی ہوا ہے جب پڑوسی ملک میں دنیا کے بڑے انتخابات کے پہلے مرحلے کا آغاز ہوچکا ہے، جہاں نریندر مودی مسلسل تیسری بار وزیراعظم منتخب ہونے کے لیے پرامید ہیں۔بین الاقوامی میڈیا رپورٹس کے مطابق فی الحال دنیا کے چوتھے امیر ترین شخص ایلون مسک کی جانب سے ان کے مجوزہ دورہ ہندوستان کے دوران 2 سے 3 بلین ڈالر کی سرمایہ کاری کا اعلان متوقع تھا، جو فل الحال کھٹائی میں پڑتا نظرآ رہا ہے۔ ایکس پر ایلون مسک نے اپنے پیغام میں لکھا کہ بدقسمتی سے ٹیسلا کی بہت بھاری ذمہ داریوں کا تقاضا ہے کہ ہندوستان کا دورہ مؤخر کیا جائے، لیکن وہ اس سال کے آخر میں دورہ کرنے کے بہت زیادہ منتظر ہوں گے۔ایلون مسک اپنے دورے کے دوران بھارتی اسپیس ٹیک اسٹارٹ اپس کے رہنماؤں سے ملنے کا بھی منصوبہ بنا رہے تھے، جس میں اسکائی روٹ ایرو اسپیس کے شریک بانی اور 2022 میں ہندوستان کا پہلا نجی طور پر تیار کردہ راکٹ لانچ کرنیوالے پون چندنا بھی شامل تھے، ٹیسلا کے علاوہ ایلون مسک خود بھی راکٹ کمپنی اسپیش ایکس اور سابقہ ٹوئٹر اور موجودہ ایکس پلیٹ فارم کے بھی مالک ہیں۔ ایلون مسک کا یہ دورہ دراصل ہندوستان میں دنیا کے سب سے بڑے جمہوری انتخابات کے آغاز کے چند دن بعد شروع ہونا تھا، جہاں ایک اندازے کے مطابق 1 ارب 40 کروڑ کی آبادی والے ملک میں 96 کروڑ شہری ان انتخابات میں ووٹ ڈالنے کے اہل ہیں، جس کا آغاز جمعہ کو ہوگا اور اسے مکمل ہونے میں ایک ماہ سے زائد وقت لگے گا۔