حملوں میں ایرانی چیف آف سٹاف سمیت کئی جوہری سائنسدان نشانہ بنے: اسرائیل کا دعویٰ

اسرائیل نے ایران پر کئے گئے فضائی حملوں میں ایرانی چیف آف سٹاف اور کئی جوہری سائنسدانوں کی ہلاکت کا دعویٰ کیا ہے۔

اسرائیلی دفاعی عہدے دار نے دعویٰ کیا ہے کہ حملوں میں ممکنہ طور پر پاسداران انقلاب کے چیف آف سٹاف میجر جنرل محمد باقری ہلاک ہوگئے ہیں،اسرائیل کی جانب سے کئے گئے حملوں میں ایران کے ایٹمی سائنسدان ڈاکٹر تہرانچی اور ڈاکٹر فرید ون عباسی کو بھی شہید کرنے کا دعویٰ کیا گیا ہے۔

اسرائیلی حکام نے دعویٰ کیا ہے کہ حملوں میں آزاد یونیورسٹی کے سربراہ محمد مہدی کو بھی نشانہ بنایا گیا، دوسری جانب القدس فورس کے سربراہ اسماعیل قانی کو بھی قتل کئے جانے کی غیر مصدقہ اطلاعات ہیں۔

عالمی میڈیا کی رپورٹ کے مطابق اسرائیل نے ایران میں درجنوں مقامات پر فضائی حملے کئے، دارالحکومت تہران کے شمال مشرقی علاقے میں بھی دھماکوں کی زور دار آوازیں سنی گئیں اور بعض مقامات سے دھویں کے بادل اٹھتے دکھائی دیئے۔تاہم

ایرانی میڈیا نے پاسداران انقلاب کے چیف آف سٹاف میجر جنرل محمد باقری اور کئی سینئر جوہری سائنسدان پر حملے اور ہلاکت کی تصدیق نہیں کی۔

ایرانی سرکاری ٹیلی ویژن نے اطلاع دی ہے کہ اسرائیل کی جانب سے کیے گئے فضائی حملوں میں تہران میں واقع اسلامی انقلابی گارڈز یعنی پاسدارانِ انقلاب کا ہیڈکوارٹر نشانہ بنا ہے۔

ایرانی میڈیا کے مطابق اسرائیل نے رہائشی علاقوں کو بھی نشانہ بنایا، جس میں متعدد بچے شہید ہو گئے ہیں۔

تاحال ایرانی حکام کی جانب سے اس حملے میں پاسداران انقلاب کے سربراہ یا دیگر عہدیداروں کی شہادت کی باضابطہ تفصیلات جاری نہیں کی گئیں۔

تہران میں سیکیورٹی الرٹ جاری کر دیا گیا ہے اور شہریوں کو محتاط رہنے کی ہدایت دی گئی ہے، جب کہ خطے میں جاری کشیدگی کے مزید بڑھنے کا خدشہ ظاہر کیا جا رہا ہے۔