سندھ اسمبلی ارکان کی تنخواہ ڈیڑھ سےبڑھ کرساڑھے4لاکھ ہوگئی
سندھ اسمبلی کے اراکین کی تنخواہیں اور مراعات میں نمایاں اضافہ کر دیا گیا ہے، جس کے بعد تنخواہ و الاؤنسز کی مجموعی رقم ڈیڑھ لاکھ سے بڑھ کر ساڑھے چار لاکھ روپے تک جا پہنچی ہے۔
تفصیلات کے مطابق 8 اگست کو اسمبلی میں تنخواہوں کے اضافے کا بل پیش کیا گیا تھا جو متفقہ طور پر منظور کیا گیا۔ بل کی منظوری کے بعد اسپیکر اویس شاہ کی سربراہی میں پارلیمانی کمیٹی قائم کی گئی جس میں اپوزیشن لیڈر علی خورشیدی سمیت تمام جماعتوں کے نمائندے شامل تھے۔
کمیٹی کے اجلاس میں اراکین نے مشاورت کے بعد تنخواہوں میں 200 فیصد اضافے کی منظوری دی۔ اس وقت اسمبلی ممبران کی تنخواہ و الاؤنسز ملا کر ایک لاکھ 55 ہزار روپے تھی، جو اب بڑھ کر تقریباً ساڑھے چار لاکھ روپے ہوجائے گی۔ بنیادی تنخواہ 50 ہزار سے بڑھا کر 3 لاکھ روپے کر دی گئی ہے۔
اس کے علاوہ آفس مینٹیننس الاؤنس 15 ہزار، ٹیلی فون الاؤنس 10 ہزار، ہاؤس رینٹ الاؤنس 50 ہزار، موبائل الاؤنس 10 ہزار، یوٹیلیٹی الاؤنس 20 ہزار، ڈیلی الاؤنس ایک ہزار سے بڑھا کر 3 ہزار اور کنوینس الاؤنس بھی ایک ہزار سے بڑھا کر 3 ہزار روپے مقرر کرنے کی منظوری دی گئی۔
پیپلز پارٹی، ایم کیو ایم اور پی ٹی آئی نے اس فیصلے کی حمایت کی جبکہ صرف جماعت اسلامی نے اس کی مخالفت کی۔
