ریحام خان کا فلم ’’چیمہ، چٹھہ، اینڈ باجوہ‘‘ بنانے کا اعلان

سابق وزیراعظم عمران خان کی سابقہ اہلیہ ریحام خان نے انکشاف کیا ہے کہ وہ بہت جلد فلم بنانے کی تیاریاں کر رہی ہیں جس کا نام ’’ چیمہ، چٹھہ، اینڈ باجوہ‘‘ ہوگا، ریحام نے تصدیق کی کہ پہلی فلم کے آٹھ سال بعد وہ دوسری فلم بنانے والی ہیں۔ریحام خان نے اپنی پہلی فلم ’جانان‘ 2016 میں ریلیز کی تھی، جس میں علی رحمٰن، بلال اشرف اور ہانیہ عامر سمیت دیگر نے کردار ادا کیے تھے اور ہانیہ عامر نے اداکاری کا آغاز بھی اسی فلم سے کیا تھا، ’’جانان‘‘ کی کامیابی کے بعد ہانیہ عامر کو بھی شہرت ملی تھی اور ریحام خان نے اب اعتراف کیا کہ انہیں پہلی فلم بنانے سے اچھی خاصی کمائی ہوئی تھی اور اب وہ دوسری فلم بنانے جا رہی ہیں۔ریحام خان نے حال ہی میں حافظ احمد پوڈکاسٹ میں شرکت کی، جہاں انہوں نے اپنی شادیوں، ملکی سیاست سمیت ملک میں بڑھتی طلاقوں پر کھل کر بات کی تھی، پوڈکاسٹ میں انہوں نے بطور فلم ساز بھی بات کی اور یہ بھی بتایا کہ پاکستان میں بھارتی فلموں کو ریلیز کرنے کی اجازت دی جانی چاہئے اور ان کی فلموں کی نمائش سے ہی پاکستانی فلمیں دیکھی جائیں گی۔ریحام کے مطابق پاکستان میں سینمائیں بہت کم ہیں اور پاکستان میں سرمایہ کار فلموں میں پیسے لگانے سے ڈرتے ہیں، پاکستان میں اس طرح کا میکینزم ہونا چاہئے کہ فلمیں بنانے کے لیے سرمایہ کاری کی سہولت ہے اور لوگوں کو فلموں میں سرمایہ کاری کی ترغیب دینی چاہئے، ماضی کے مقابلے میں اب پاکستانی فلمیں بھی اچھی کمائی کرلیتی ہیں لیکن اب بھی پاکستانی فلموں کی کمائی اتنی اچھی نہیں ہوتی۔ایک سوال کے جواب میں انہوں نے انکشاف کیا کہ انہوں نے جانان فلم انتہائی کم پیسوں سے بنائی تھی اور وہ پیسے اتنے کم تھے کہ وہ بتانا بھی نہیں چاہتیں، تاہم انہوں نے اعتراف کیا کہ کم بجٹ پر فلم بنائے جانے کے باوجود ان کی فلم نے اچھی کمائی کی لیکن انہوں نے کمائی بھی نہیں بتائی، تصدیق کی کہ اب 8 سال بعد وہ دوبارہ ’چیمہ، چٹھہ اینڈ باجوہ‘ کے نام سے پنجابی فلم بنانے جا رہی ہیں۔انہوں نے بتایا کہ بہت پیار اور محنت سے فلم کی کہانی لکھی ہے اور فلم مکمل طور پر رومانوی اور مزاحیہ ہوگی اور اس میں زیادہ تر پنجابی زبان ہوگی۔بھارتی پنجابیوں نے کینیڈا، امریکا اور برطانیہ میں موجود پنجابی کمیونٹی کے لیے اچھی فلمیں بنائیں اور انہوں نے اچھی کمائی بھی کی، اس لیے انہوں نے بھی بیرون ممالک مقیم پاکستان کی پنجابی کمیونٹی کے لیے فلم بنائی ہے جس سے انہیں اچھی امیدیں وابستہ ہیں۔ریحام خان نے فلم کی کاسٹ کے حوالے سے بتایا کہ ان کی فلم کا ہیرو 27 یا 28 سال کا ہوگا، اس لیے انہیں اپنا ہیرو تلاش کرنے میں مشکلات درپیش ہیں لیکن انہیں اُمید ہے کہ انہیں ہیرو مل جائے گا۔