ڈیزل مہنگاہونےپرٹرینوں کے کرایوں میں 2فیصد اضافہ
پیٹرولیم مصنوعات کی قیمتوں میں اضافے کے بعد پاکستان ریلوے نے بھی ٹرین کے کرایوں میں 2 فیصد اضافہ کر دیا ہے۔ اس اضافے کا باقاعدہ نوٹیفکیشن جاری کر دیا گیا ہے۔
کرایوں میں یہ اضافہ 4 جولائی سے نافذ العمل ہوگا اور اس کا اطلاق تمام مسافر ٹرینوں، شٹل اور سیلون گاڑیوں پر کیا جائے گا۔ نوٹیفکیشن میں یہ بھی واضح کیا گیا ہے کہ کرایوں میں اضافے کا اطلاق ایڈوانس بکنگ پر بھی ہوگا۔
ریلوے حکام کے مطابق ڈیزل کی قیمتوں میں اضافے کے باعث ادارے کو ماہانہ تقریباً 10 کروڑ 90 لاکھ روپے کا مالی نقصان برداشت کرنا پڑ رہا تھا، جس کے پیش نظر کرایوں میں اضافہ ناگزیر ہو گیا۔
دوسری جانب، حکومت نے یکم جولائی سے پیٹرولیم مصنوعات کی قیمتوں میں رد و بدل کیا تھا۔ وزارت خزانہ کے نوٹیفکیشن کے مطابق، ڈیزل کی قیمت میں 10 روپے 39 پیسے اور پیٹرول کی قیمت میں 8 روپے 36 پیسے فی لیٹر اضافہ کیا گیا۔
اس اضافے کے بعد ڈیزل کی نئی قیمت 272 روپے 98 پیسے اور پیٹرول کی قیمت 266 روپے 79 پیسے فی لیٹر ہو گئی ہے۔
ریلوے انتظامیہ نے ڈائریکٹر آئی ٹی اور ڈی ایس افسران کو نئے کرایوں کے مطابق عملدرآمد کی ہدایات جاری کر دی ہیں۔
