وزیراعظم شہبازشریف سے ترک صدرکی ملاقات،باہمی امورپرتبادلہ خیال
وزیر اعظم پاکستان محمد شہباز شریف سےتیانجن میں ترکیہ کےصدررجب طیب اردوان سےملاقات ،باہمی امور پرتبادلہ خیال کیاگیا۔
تفصیلات کے مطابق وزیراعظم شہبازشریف اور ترک صدر کے مابین ملاقات میں دونوں رہنماؤں نے پاک–ترک تعلقات کا تفصیلی جائزہ لیا اور سیاسی، اقتصادی، دفاعی اور سلامتی کے شعبوں میں بڑھتے ہوئے تعاون پر اطمینان کا اظہار کیا۔ انہوں نے اعلیٰ سطحی رابطوں اور مشترکہ کوششوں کو سراہتے ہوئے انہیں مزید آگے بڑھانے کے عزم کا اعادہ کیا۔
صدر اردوان نے پاکستان میں حالیہ مون سون بارشوں اور سیلابی صورتحال کے باعث قیمتی جانوں کے ضیاع اور مالی نقصانات پر گہرے دکھ اور ہمدردی کا اظہار کرتے ہوئے کہا کہ ترکیہ کی حکومت اور عوام مشکل وقت میں پاکستان کے ساتھ کھڑے ہیں۔
ملاقات میں اہم علاقائی اور عالمی امور پر بھی تبادلہ خیال کیا گیا۔ دونوں رہنماؤں نے غزہ کی بگڑتی ہوئی انسانی صورتحال پر شدید تشویش ظاہر کی اور فلسطینی عوام کے حقِ خودارادیت کی بھرپور حمایت کی۔ انہوں نے اسرائیلی جارحیت اور نسل کشی کی پالیسیوں کی سخت مذمت کرتے ہوئے بین الاقوامی فورمز پر مشترکہ کوششوں کے عزم کو دہرایا۔
وزیراعظم شہباز شریف اور صدر اردوان نے اس بات پر اتفاق کیا کہ پاکستان اور ترکیہ کے گہرے برادرانہ تعلقات کو مزید وسعت دی جائے تاکہ مسلم دنیا سمیت عالمی امن، استحکام اور خوشحالی کے لیے مشترکہ کردار ادا کیا جا سکے۔
