اداکارہ حرا، ارسلان خان رشتہ ازدواج میں منسلک ہوگئے؟

اداکارہ حرا خان، ارسلان خان کو شادی کی پیشکش کرنے کے بعد ان کے ساتھ رشتہ ازدواج میں منسلک ہو گئی ہیں، اداکارہ نے گھٹنوں پر بیٹھ کر ارسلان کو شادی کی پیشکش کی تھی اور اس تصویر کو انسٹاگرام پر شیئر کرتے ہوئے مداحوں کو خوشخبری دی تھی۔

حرا خان اور ارسلان خان کی شادی کی تقریبات گزشتہ ہفتے اس وقت شروع ہوئی تھیں جب اداکارہ نے ساتھی اداکار کو رومانوی انداز میں شادی کی پیش کش کی تھی۔حرا خان نے گزشتہ ہفتے انسٹاگرام پر ایک ویڈیو جاری کی تھی، جس میں انہوں نے فلمی انداز میں گھٹنوں پر بیٹھ کر ارسلان خان کو شادی کی پیش کش کی تھی، جسے اداکار نے قبول کر لیا تھا، بعد ازاں اداکارہ اور ارسلان خان نے شادی کی تقریبات کی ویڈیو اور تصاویر بھی شیئر کی تھیں، جن میں دونوں کو اپنی شادی کی تقریبات پر رقص کرتے بھی دیکھا گیا۔

حرا خان نے ارسلان خان کے ساتھ ڈانس ویڈیوز کو شیئر کرتے ہوئے انسٹاگرام پوسٹس میں بتایا تھا کہ ان کے قریبی دوستوں کو معلوم ہے کہ ارسلان کو ڈانس کرنا نہیں آتا لیکن چونکہ وہ اپنے ہونے والے دُلہے کے ساتھ ڈانس کرنا چاہتی تھیں، اسی لیے ان کی خواہش پر ارسلان نے گزشتہ 2 ماہ سے ہر دن 6 سے 7 گھنٹے ڈانس کی پریکٹس کرکے رقص سیکھا۔بعد ازاں ارسلان خان نے بھی ایک پوسٹ میں اعتراف کیا کہ انہیں ڈانس نہیں آتا تھا لیکن حرا خان کی فرمائش اور محبت پر انہوں نے ڈانس سیکھا اور اپنی شادی پر دلہن کے ہمراہ رقص کیا، دونوں کی شادی کی تقریبات کی متعدد ویڈیوز سوشل میڈیا پر وائرل ہوگئیں، جس پر شوبز شخصیات اور ان کے مداحوں نے تبصرے کرتے ہوئے انہیں نئی زندگی شروع کرنے پر مبارک باد بھی پیش کی۔

یاد رہے کہ حرا خان نے 2017 میں ’مِس ویٹ پاکستان‘ کا ٹائٹل جیتا تھا، جس کے بعد انہوں نے ٹیلی ویژن انڈسٹری میں اپنے کیریئر کا آغاز کیا اور متعدد اشتہارات اور ڈراموں میں کام کیا، حرا خان حال ہی میں نشر کیے گئے ڈرامے ’وہ پاگل سی‘ اور ’میرے ہمسفر ’ میں اپنے کردار ’رومی‘ سے مشہور ہوئیں جبکہ انہوں نے 2021 میں ڈرامہ سیریل ’پھانس‘ سے شوبز انڈسٹری میں ڈیبیو دیا تھا۔

ارسلان خان ایک ماڈل اور اداکار ہیں جنہوں نے 2012 میں اپنے کیریئر کا آغاز کیا، انہوں نے متعدد برانڈز کے لیے ماڈلنگ کی۔ شوبز انڈسٹری میں قدم رکھنے سے پہلے وہ 2010 میں بیڈمنٹن ورلڈ چیمپئن شپ اور دیگر کئی بین الاقوامی مقابلوں میں ملائیشیا میں پاکستان کی نمائندگی کرنے والے سب سے کم عمر کھلاڑی تھے، انہوں نے تین بار ’نیشنل جونیئر چیمپئن‘ کا اعزاز بھی حاصل کیا۔اس جوڑی نے شارٹ فلم ’نام بدل دینا‘ میں بھی ایک ساتھ اداکاری کی، یہ شارٹ فلم کانز فلم فیسٹیول میں فائنلسٹ کے طور پر منتخب ہوئی تھی۔

PSL8: پشاور زلمی نے کراچی کنگز کو شکست دےدی

Related Articles

Back to top button