اداکار بلال اشرف اپنی ہی شادی سے لا علم کیوں؟

ایشیا کے 50 پرکشش مردوں میں شامل اداکار بلال اشرف نے اپنے مداحوں کو ورطہ حیرت میں ڈالتے ہوئے بتایا کہ سنگل ہوں یا نہیں ہوں، مجھے نہیں پتہ، بلال نے اپنی اداکاری کو فلموں تک ہی محدود رکھا تھا اور اس بارے میں ان کا ہمیشہ سے یہی کہنا تھا کہ ان کی ترجیح فلم ہی ہے۔

تاہم گذشتہ برس بلال اشرف نے جب کئی نامور ڈرامہ نگاروں کی پیشکش کو مسترد کرنے کے بعد اچانک ہم ٹی وی کا ڈراما ’یونہی‘ سائن کر لیا تو سب کو حیرت ہوئی۔انڈپینڈنٹ اردو سے خصوصی گفتگو کے دوران بلال اشرف نے ہلکے پھلکے انداز میں کہا کہ چونکہ ڈرامے کا نام ’یونہی‘ ہے اس لیے بس ’یونہی‘ کر لیا۔

اداکار نے تسلیم کیا کہ پاکستانی ڈراما اپنی ہیئت میں ایک ادارے کی حیثیت رکھتا ہے، اس لیے وہ اپنے کام میں بہتری لانا چاہتے تھے اور اس لیے انہوں نے اس جانب رخ کیا کیونکہ ہم ٹی وی اور مومنہ درید پروڈکشن اس کے لیے بہترین ذریعہ ہو سکتے تھے۔

بلال اشرف نے اس سے پہلے ہم ٹی وی اور مومنہ درید پروڈکشن کے ہی کئی ڈراموں میں کام کرنے کی پیشکش کو مسترد کیا تھا، انہوں نے بتایا کہ ثروت نظیر نے اپنی اس کہانی میں بہت سے پیغامات انتہائی سادگی اور خوبصورتی سے دے دیئے ہیں۔

اپنے کردار کے بارے میں بلال اشرف کا کہنا تھا کہ داؤد کا کردار ایک بہت ہی متحمل مزاج شخص کا ہے جو بہت سلجھا ہوا ہے، غصہ ہو یا پھر غم، وہ اظہار ہمیشہ خود کو قابو میں رکھ کر ہی کرتا ہے، وہ اپنے خاندان کا ایک ستون ہے جو دنیا کو اخلاقی پیمانے سے پرکھتا ہے، جو قدیم و جدید روایات کا امتزاج رکھتا ہے۔

مایا علی کے ساتھ پہلی بار اداکاری کے بارے میں بلال اشرف نے بتایا کہ اتنی زبردست اداکارہ کے ساتھ کام کرنا بہت ہی اچھا ہوتا ہے اگرچہ ان دونوں نے اس سے پہلے ایک ساتھ اداکاری نہیں کی مگر کچھ اشتہارات اور فیشن شوٹ کیے ہیں اور تب ہی سے ان کی اس جوڑی کو عوام میں پذیرائی حاصل ہے۔

انہوں نے انکشاف کیا کہ انہیں بہت سی فلموں کی پیشکش ہوئی لیکن جو کہانی دل کو بھائے وہی کرنے کا دل چاہتا ہے، ایکشن ہیرو کے طور پر شوبز میں آنے والے بلال اشرف کی دلچسپی کا محور تو ایکشن ہی رہا ہے، اداکار کے مطابق ماہرہ خان، مایا علی، مہوش حیات اور صبا قمر بہت اچھی اداکارائیں ہیں، انہیں بطور ایکشن ہیروئن بھی جب تک موقع نہیں ملے گا وہ اپنا کام کیسے دکھائیں گی، اس لیے ابھی یہ کہنا کہ کون ہیروئن ہوگی ممکن نہیں۔

برطانوی جریدے ’ایسٹرن آئی‘کی جانب سے ایشیا کے 50 پُرکشش ترین مردوں ساتویں پوزیشن حاصل کرنے والے بلال اشرف نے انتہائی معنی خیز مسکراہٹ کے ساتھ بتایا کہ ’سنگل ہوں یا نہیں ہوں، مجھے نہیں پتہ، یہ تو آپ کو بعد میں دیکھنا پڑے گا‘۔

بلال اشرف نے کچھ شکایت کرتے ہوئے کہا کہ جب انہوں نے فلم ’سپر سٹار‘ میں سین کیا تھا تو اس وقت تو ان کی جسامت پر بہت لوگوں نے بڑے ہی منفی جملے کسے تھے، لیکن جب پاکستان کے باہر سے کوئی اس کام کی تعریف کردے، تو ہر کوئی یہاں بھی تعریف کرنے لگتا ہے۔

انہوں نے کہا کہ لوگوں کو چاہئے کہ اپنے اداکاروں کی عزت کریں، کیونکہ یہ سب عوام کے لیے ہی کام کرتے ہیں، پاکستان کے اداکاروں کو انڈیا یا کسی اور ملک سے پذیرائی کی ضرورت نہیں ہونی چاہئے، پاکستان کے عوام اپنے اداکاروں کو اپنا سمجھیں۔