بگ باس 13 کے وِنر سدھارتھ شکلا 40 برس کی عمر میں انتقال کرگئے

بھارت کے متنازع ترین ریئلٹی شو ‘بگ باس ‘ کے سیزن 13 کے فاتح اور بھارتی اداکار سدھارتھ شکلا دل کا دورہ پڑنے کے باعث 40 برس کی عمر میں انتقال کرگئے۔

انڈیا ٹوڈے کی رپورٹ کے مطابق ممبئی کے کوپر ہسپتال نے تصدیق کی ان کا انتقال آج (2 ستمبر) کی صبح ہوا۔

قبل ازیں ہسپتال ذرائع نے کہا تھا انہوں نے سونے سے قبل کوئی دوائی لی تھی اور پھر وہ جاگ نہ سکے۔

تاہم بعد ازاں کوپر ہسپتال نے تصدیق کی کہ سدھارتھ شکلا کا انتقال دل کا دورہ پڑنے سے پوا۔

کوپر ہسپتال میں سدھارتھ شکلا کا پوسٹ مارٹم جاری ہے اور جلد ہی لاش کو ان کے لواحقین کے حوالے کیا جائے گا، ان کے پسماندگان میں ان کی والدہ اور 2 بہنیں ہیں۔

دوسری جانب پریس ٹرسٹ آف انڈیا کو کوپر ہسپتال کے ایک سینئر عہدیدار نے بتایا کہ سدھارتھ شکلا کو مردہ حالت میں ہسپتال لایا گیا۔

انہوں نے بتایا کہ ‘کچھ دیر قبل ہی سدھارتھ شکلا کا مردہ حالت میں لایا گیا تھا’۔

سدھارتھ شکلا کے انتقال کی خبر پر بھارتی شوبز شخصیات اور مداحوں کی جانب سے غم کا اظہار کیا جارہا ہے۔

خیال رہے کہ سدھارتھ شکلا نے ماڈلنگ کے ذریعے شوبز میں اپنے کیریئر کا آغاز کیا تھا اور ٹی وی شو ‘بابل کا آنگن چھوٹے نا’ میں مرکزی کردار سے اداکاری کے میدان میں قدم رکھا تھا۔
بشکریہ: ڈان نیوز