حکومت کا سرکاری ملازمین کی تنخواہیں نہ بڑھانے کا فیصلہ
حکومت نے سرکاری ملازمین کی تنخواہیں نہ بڑھانے کا فیصلہ کر لیا، وفاقی کابینہ نے سالابہ بجٹ برائے 21-2020 کی تجاویز کی منظوری دیدی۔
وفاقی کابینہ کا خصوصی اجلاس وزیراعظم عمران خان کی زیر صدارت ہوا جس میں بجٹ تجاویز کے حوالے سے تبادلہ خیال کیا گیا۔مشیر خزانہ عبدالحفیظ نے وفاقی بجٹ پر خصوصی بریفنگ دی۔ کابینہ کو ترقیاتی بجٹ سبسڈی، برامدات، درآمدات پر قرضوں سمیت مجموعی گرانٹس، ٹیکسز کی شرح، دفاعی اور تعلیمی بجٹ پر بھی بریفنگ دی گئی۔
خصوصی اجلاس میں وزیر اعظم عمران خان بھی کابینہ اراکین سے خطاب کیا اور اجلاس میں موجود ارکان کو مجموعی بجٹ پر اعتماد میں لیا گیا۔وفاقی کابینہ کے خصوصی اجلاس میں بجٹ تجاویز کی منظوری دیدی گئی ہے، آئندہ مالی سال کا بجٹ آج قومی اسمبلی میں پیش کیا جائے گا۔ذرائع کا بتانا ہے کہ وفاقی کابینہ نے سرکاری ملازمین کی تنخواہوں اور پنشن میں اضافہ نہ کرنے کا فیصلہ کیا ہے، تنخواہیں اور پنشن گزشتہ سال کی سطح پر برقرار رہیں گی۔
وفاقی کابینہ کی جانب سے بجٹ تجاویز کی منظوری کے بعد آئندہ مالی سال کا بجٹ قومی اسمبلی میں پیش کردیا گیا۔
وفاقی کابینہ کے اجلاس میں سرکاری ملازمین کی تنخواہوں و پنشن میں اضافے کے معاملہ پر بحث کی گئی اور کابینہ نے موجودہ حالات کے تناظر میں تنخواہوں و پنشن میں اضافہ نہ کرنے کا فیصلہ کیا ہے جس کے بعد سرکاری ملازمین کی تنخواہیں اور پنشن گزشتہ سال کی سطح پر برقرار رہیں گی۔
