آرمی چیف کا خط پرردعمل عمران خان کو صاف جواب ہے،راناثنا

مسلم لیگ ن کے سینئررہنما رانا ثنااللہ نےکہا ہے کہ آرمی چیف کا خط پرردعمل عمران خان کو صاف جواب ہی سمجھا جائے۔

مشیروزیراعظم راناثنااللہ کا  نجی ٹی وی سےگفتگو میں کہنا تھا کہ آرمی چیف جنرل سید عاصم منیر نے بانی پی ٹی آئی کےخط کےحوالے سے ردعمل میں بڑا مختصر اور واضح جواب دیا ہے، آرمی چیف نےبراہ راست توجواب نہیں دیا بلکہ صحافیوں کے سوال کا جواب دیا۔

رانا ثنااللہ نے کہا کہ بانی پی ٹی آئی  عمران خان کا خط صرف فوج کے خلاف پروپیگنڈا کرنے کابیانیہ ہے، خط لکھنے کے بہانے بانی پی ٹی آئی عمران خان وہ باتیں کرنا چاہتے ہیں کہ جو وہ سمجھتے ہیں کہ خط کےعلاوہ اگر وہ یہ باتیں کریں تو کسی کو اعتراض ہوسکتا ہے کہ وہ فوج کےخلاف پروپیگنڈا کررہے ہیں۔ان کا کہنا تھا کہ عمران خان کہیں گے کہ وہ تو صرف خط لکھ رہے ہیں پروپیگنڈا نہیں کررہے، آرمی چیف کا ردعمل عمران خان کو صاف جواب ہی سمجھیں۔

سابق وزیر رانا ثنااللہ  نے کہا کہ عمران خان کی چالیں ہرکوئی سمجھتا ہے، خط کوئی دروازہ کھولنے والی باتیں نہیں ہیں،عمران خان کا کوئی ارادہ نہیں ہے کہ وہ فوج کے خلاف بیانیے، جیسا کہ انہوں نے9 مئی کو کیا، اس سے پیچھے ہٹیں،معذرت کریں یا افسوس کا اظہار کریں۔

وزیراعظم کے مشیرنے کہا کہ عمران خان نےجیسےچیف جسٹس کو خط بھیجا ہے اور میڈیا کو جاری نہیں کیا اس طرح اگر وہ آرمی چیف کو بھیجا گیا خط بھی میڈیا کو جاری نہ کرتے تو شاید انہیں خط کا جواب مل بھی جاتا، جب انہوں نے پہلے ہی خط میڈیا کو جاری کردیا تو اس کامطلب ہے کہ وہ صرف پروپیگنڈا کررہے ہیں۔

یاد رہے کہ آرمی چیف جنرل سید عاصم منیر نےصحافیوں کےسوالات کے جواب میں کہا کہ انہیں کسی کا کوئی خط نہیں ملا۔ خط ملا بھی تو نہیں پڑھیں گے۔

آئی ایس پی آر کے مطابق آرمی چیف جنرل عاصم منیر نے کہا ’اگر کوئی خط ملا تو وزیر اعظم کو بھجوا دوں گا۔ خط کی باتیں سب چالیں ہیں۔‘

آرمی چیف نے کہا کہ پاکستان آگے بڑھ رہا ہے اورپاکستان کو آگے ہی بڑھنا ہے، ملک بہت اچھے انداز سے آگے بڑھ رہا ہے، پاکستان میں ترقی ہو رہی ہے۔

واضح رہے کہ آرمی چیف نے کسی کا نام لیےبغیر خط کا ذکر بانی پی ٹی آئی کی جانب سے اس دعویٰ کے پس منظر میں کیا، جس کے مطابق انہوں نے آرمی چیف کو سیاسی صورتحال سے متعلق پےدرپے تین خطوط ارسال کیے ہیں۔

اس حوالے سے چیئرمین تحریکِ انصاف بیرسٹر گوہر نے کہا تھا کہ بانی پی ٹی آئی عمران خان نے بطور سابق وزیرِ اعظم آرمی چیف جنرل عاصم منیر کو خط لکھ کر ان سے پالیسیوں کا ازسرِ نو جائزہ لینے کی اپیل کی ہے۔ تاہم بعد میں انہوں نے ایک نجی چینل پر گفتگو کرتے ہوئے کہا تھا کہ عمران خان نے کہا ہے کہ انہوں نے آرمی چیف کو خط لکھا، میں نے اب تک بانی پی ٹی آئی کا یہ خط پڑھا یا دیکھا نہیں۔