ارشدندیم جیولن تھرو کی نئی رینکنگ میں چوتھےنمبرپرآگئے

 ورلڈ ایتھلیٹکس فیڈریشن نے جیولن تھرو کی تازہ ترین عالمی رینکنگ جاری کر دی ہے، پاکستان کے نامور اتھلیٹ ارشد ندیم 1370 پوائنٹس کے ساتھ چوتھے نمبر پر آ گئے ہیں۔

رینکنگ میں بہتری نہ آنے کی وجہ یہ ہے کہ ارشد ندیم نے رواں سال اب تک صرف ایک بین الاقوامی ایونٹ، ایشین ایتھلیٹکس چیمپیئن شپ میں شرکت کی، جہاں انہوں نے 86.40 میٹر کی شاندار تھرو کے ساتھ گولڈ میڈل اپنے نام کیا۔

عالمی رینکنگ میں بھارت کے نیرج چوپڑا 1445 پوائنٹس کے ساتھ بدستور سرفہرست ہیں، جبکہ گرینیڈا کے اینڈرسن پیٹرز دوسرے اور جرمنی کے جولین ویبر تیسرے نمبر پر ہیں۔

ارشد ندیم ستمبر میں ہونے والی ورلڈ چیمپیئن شپ سے قبل مزید دو سے تین بین الاقوامی مقابلوں میں شرکت کا ارادہ رکھتے ہیں، جن سے ان کی عالمی رینکنگ میں بہتری کی قوی امید ہے۔

یاد رہے کہ ارشد ندیم نے گزشتہ سال پیرس اولمپکس میں 92.97 میٹر کی تاریخی تھرو کرتے ہوئے گولڈ میڈل جیتا تھا، جو پاکستان کی ایتھلیٹکس تاریخ میں ایک ناقابلِ فراموش لمحہ تھا۔