آسٹریلوی کرکٹ بورڈ نے دورہ پاکستان کی تصدیق کردی

آسٹریلیا نے آئندہ برس وائٹ بال سیریز کے لیے پاکستان کے دورہ کی تصدیق کر دی۔

کرکٹ آسٹریلیا کے چیف ایگزیکٹیو افسر ٹاڈ گرین برگ نے صحافیوں سےگفتگو کرتے ہوئے کہا کہ ہم آئندہ برس پاکستان کا دورہ کر رہے ہیں، مجھے معلوم ہے کہ یہ دورہ پاکستان کے ساتھ کرکٹ تعلقات کو مضبوط بنانے کے لیے بہت ضروری ہے، پاکستان کے خلاف سیریز ہمارے شیڈول کا اہم حصہ ہے۔

ٹاڈ گرین برگ نے کہا کہ  ریڈ بال سیریز کے لیے بھی ہماری پی سی بی  سے بات چیت جاری ہے، 22-2021 میں کئی سالوں کے بعد پاکستان کا شاندار دورہ کیا، کینگروز کا دورہ پاکستان خطے کی کرکٹ کیلئے ایک تاریخی لمحہ تھا۔

کرکٹ آسٹریلیا کے چیف ایگزیکٹیو افسر ٹاڈ گرین برگ  نے مزید کہا کہ آسٹریلوی بگ بیش لیگ (بی بی ایل) میں شرکت کے لیے آنے والے پاکستانی کھلاڑیوں کو ہم خوش آمدید کہیں گے، ہماری کوشش ہوتی ہے کہ ہم دنیا بہترین کھلاڑیوں کو اپنی ٹیموں کا حصہ بنائیں، چاہے ان کا تعلق کسی بھی ملک سے ہو۔

کرکٹ آسٹریلیا کے چیف ایگزیکٹیو آفیسرنے دورہ پاکستان کی تصدیق تو کردی، تاہم اس دورے میں وینیوز اور حتمی تاریخ کیا ہوں گی اس پر دونوں کرکٹ بورڈز کے درمیان بات چیت جاری ہے۔