چین نےایرانی ایئرلائنز پرامریکی پابندیوں کی مخالفت کردی

چین نے ایرانی ایئرلائنز پر ممکنہ امریکی پابندیوں کی مخالفت کرتے ہوئے انہیں ’غیر قانونی‘ قرار دیا ہے۔

چینی وزارت خارجہ کے ترجمان گو جیاکون نے کہا کہ بیجنگ ایسی یک طرفہ پابندیوں کی مخالفت کرتا ہے جن کی بنیاد بین الاقوامی قانون یا اقوام متحدہ کی سلامتی کونسل کی اجازت پر نہ ہو۔

چینی ترجمان کا یہ بیان امریکی وزیر خزانہ سکاٹ بیسنٹ کی جانب سے ایرانی ایئرلائنز کے خلاف ممکنہ نئی پابندیوں کی دھمکی کے ایک روز بعد سامنے آیا ہے۔ بیسنٹ نے کہا تھا کہ واشنگٹن ایرانی فضائی کمپنیوں پر دباؤ بڑھانے کیلئے اقدامات کرسکتا ہے، جس سے ان کی بین الاقوامی سرگرمیاں متاثر ہوسکتی ہیں۔

گو جیاکون نے کہا کہ چین اصولی طور پر ایسی یک طرفہ پابندیوں کی مخالفت کرتا ہے جو بین الاقوامی قانون کی بنیاد کے بغیر عائد کی جائیں۔

بیجنگ کا مؤقف ہے کہ بین الاقوامی معاملات میں پابندیوں اور دیگر اقدامات کیلئے متعلقہ عالمی قوانین اور اقوام متحدہ کے کردار کو مدنظر رکھا جانا چاہیے۔

یہ بیان ایسے وقت میں سامنے آیا ہے جب امریکا اور ایران کے درمیان کشیدگی جاری ہے اور واشنگٹن تہران پر معاشی اور سفارتی دباؤ بڑھانے کی کوشش کر رہا ہے۔

چینی صدر شی جن پنگ بھی 23 سے 25 ستمبر تک امریکا کا دورہ کرنے والے ہیں، جہاں ان کی امریکی صدر ڈونلڈ ٹرمپ سے ملاقات متوقع ہے۔

ایرانی ایئرلائنز کے خلاف ممکنہ امریکی اقدامات اور چین کی مخالفت سے امریکا اور چین کے درمیان ایران کے معاملے پر پالیسی اختلاف بھی نمایاں ہوگیا ہے۔