صنم سعید فلم میں بے ڈھنگا ڈانس کرنے پر تنقید کی زد میں

معروف اداکارہ صنم سعید کو اپنی آنے والی فلم میں بے ڈھنگا ڈانس کرنا مہنگا پڑ گیا اور لوگوں نے انہیں سخت تنقید کا نشانہ بنایا۔ اداکار محب مرزا کی ڈائریکشن میں بننے والی ڈیبیوفلم ’عشرت: میڈ ان چائنا‘ کے ایک گانے ’عشرت تیرے لو میں لڑکی‘ کو حال ہی میں ریلیز کیا گیا تھا، جس میں صنم سعید کو دیگر لڑکیوں کے ہمراہ ڈانس کرتے دکھایا گیا۔ محب مرزا اور صنم سعید کے فلمائے گئے گانے میں دونوں اداکاروں کے بیکار ڈانس پر لوگوں نے سخت ناراضی کا اظہار کرتے ہوئے اداکارہ کو آڑے ہاتھوں لیا اور انہیں بے ڈھنگا ناچ کرنے پر شدید تنقید کا نشانہ بنایا۔

لوگوں نے صنم سعید کی ڈانس پر ناپسندیدگی کا اظہار کرتے ہوئے سوشل میڈیا پر اپنے ردعمل میں لکھا کہ کے صنم سعید کا حال ناچ نہ جانے آنگن ٹیڑھا والا ہے۔ اکثر صارفین کا کہنا تھا کہ اگر انہیں ڈانس نہیں کرنا آتا تو انہیں اس پنگے میں پڑنا ہی نہیں چاہیے تھا۔ نازیہ کمال نامی ایک صارف نے ٹوئٹر پر لکھا کہ صنم کو نہ تو ڈانس کرنے آتا ہے اور نہ ہی ان کے ڈانس کو دیکھ کر ایسا لگ رہا ہے کہ انہوں نے دل سے کام کیا۔

جہاں لوگوں نے صنم سعید کے ڈانس کو بیکار قرار دیا، وہیں ندیم شوکت نامی ایک صارف نے لکھا کہ فلم میں اداکاری ادا کیا گیا کردار اور ڈانس صنم کی شخصیت پر نہیں جچتا، انکا کہنا تھا کہ اداکارہ کے بہت بڑے مداح ہیں اور ان کو پسند کرتے رہے ہیں مگر انہیں ڈانس نہیں کرنا چاہیے تھا، کیوں کہ ان پر ڈانس اچھا نہیں لگ رہا۔

عامر لیاقت کی تیسری بیوی دوسری اہلیہ کو واپس بلانے پر تیار

مداحوں نے صنم سعید کے ڈانس پر سخت تنقید کرنے سمیت محب مرزا کو بھی آڑے ہاتھوں لیا اور کہا کہ ان کے گانے کا کوریوگرافر یعنی ڈانس ڈائریکٹر بھی کافی ماٹھا ہوگا، اس لیے ان سے ڈانس نہیں کیا جا رہا۔ ’عشرت تیرے لو میں لڑکی‘ کو رشمیت اور اسد رضا سونو نے گایا ہے جب کہ اس کی موسیقی سمیع خان نے ترتیب دی ہے۔ ’عشرت: میڈ ان چائنا‘ کو آئندہ ماہ تین فروری کو پاکستان سمیت دیگر ممالک کے سینما گھروں میں پیش کیا جائے گا، اس فلم کو گزشتہ برس ریلیز کیا جانا تھا۔

احسن رضا فردوسی کی لکھی گئی فلم کی ہدایات جہاں محب مرزا نے دی ہیں، وہیں اس میں اسسٹنٹ ڈائریکٹرز کی حیثیت سے ان کا ساتھ تحسین خان اور پرمیش ادیوال نے بھی دیا ہے۔ فلم کا ٹریلر رواں ماہ 14 فروری کو جاری کیا گیا تھا، جسے دیکھ کر معلوم ہوتا ہے کہ شائقین کو نہ صرف ایکشن بلکہ سسپنس، مصالحہ اور ممکنہ طور پر آئٹم سانگ بھی دیکھنے کو ملیں گے۔

عشرت: میڈ ان چائنا‘ سے محب مرزا ہدایت کاری جب کہ ایچ ایس وائے فلمی اداکاری کا آغاز کرنے جا رہے ہیں، علاوہ ازیں مذکورہ فلم کے ذریعے سارہ لورین بھی بولی وڈ کے بعد پاکستانی فلموں میں واپسی کر رہی ہیں۔ ’عشرت: میڈ ان چائنا‘ محب مرزا کے 2006 کے مقبول کامیڈی ڈرامے ’عشرت باجی‘ کا تسلسل ہے اور فلم میں جہاں وہ اداکاری کرتے دکھائی دیں گے، وہیں وہ اس کے ذریعے ہدایت کاری کی دنیا میں بھی قدم رکھیں گے۔ ’عشرت: میڈ ان چائنا‘ کی شوٹنگ چین کے بجائے تھائی لینڈ میں کی گئی تھی اور گزشتہ برس شوٹنگ کے دوران کورونا کی وبا کے باعث فلم کی ٹیم وہاں پھنس بھی گئی تھی۔