فیصل قریشی کا ڈرامہ کیس نمبر 9 پر تنقید کا جواب
اداکار فیصل قریشی کا ڈرامہ کیس نمبر 9 پر تنقید کا جواب دیتے ہوئےکہنا تھا کہ ہم نے وہ دکھایا جو معاشرے میں ہو رہا ہے۔
معروف اداکار فیصل قریشی نے اپنے حالیہ ڈرامے کیس نمبر 9 پر ہونے والی تنقید کا دوٹوک جواب دیتے ہوئے کہا ہے کہ اس ڈرامے کا مقصد بولڈ مواد دکھانا نہیں بلکہ معاشرے میں موجود تلخ حقائق کو اجاگر کرنا ہے۔
فیصل قریشی بشر مومن، میری ذات ذرۂ بے نشاں، حیوان، ہُک، فرق اور خائی جیسے کامیاب ڈراموں سے شہرت حاصل کر چکے ہیں اور اس وقت وہ اپنے نئے پروجیکٹ کیس نمبر 9 میں ایک منفی کردار کے ذریعے ناظرین کی توجہ کا مرکز بنے ہوئے ہیں۔
ان کا ریپسٹ کے روپ میں جاندار اور حقیقت کے قریب کردار شائقین کی خوب تعریف سمیٹ رہا ہے، تاہم کچھ حلقوں کی جانب سے اس ڈرامے کے مواد کو بولڈ قرار دیا جارہا ہے، جس پر اداکار نے وضاحت پیش کی ہے۔
فیصل قریشی نے نجی ٹی وی کے مارننگ شو میں گفتگو کے دوران کہا کہ مجموعی طور پر لوگوں نے ڈرامے کو سراہا ہے، لیکن کچھ ناظرین کا خیال ہے کہ اس کا مواد بولڈ ہے، حقیقت یہ ہے کہ کئی خواتین کو کام کی جگہوں پر ہراسانی کا سامنا ہوتا ہے، ہم نے وہی دکھایا جو معاشرے میں واقعی پیش آ رہا ہے۔
