حکومت نےبجلی کے یکساں ٹیرف کے نفاذ کیلئےنیپراسےرجوع کرلیا

حکومت نے ملک بھر میں بجلی کے یکساں ٹیرف کے نفاذ کیلئے نیپرا سے رجوع کرلیا۔

 نیپرا ٹیریف کے حوالے سے یکم جولائی کو سماعت کرے گی۔ وفاقی حکومت نے یہ درخواست نیپرا ٹیرف قواعد 1998 کے قاعدہ 17 کے تحت جمع کروائی ہے۔

درخواست میں موقف اختیار کیا گیا ہے کہ مجوزہ ٹیرف میں سبسڈی کی فراہمی اور تقسیم کار کمپنیوں کے درمیان نرخوں کی تطبیق (ریٹ ریشنلائزیشن) شامل کی جائے، تاکہ تمام صارفین کو مساوی نرخ پر بجلی فراہم کی جا سکے۔ اس ٹیرف کو یکم جولائی 2025 سے نافذ کرنے کی تجویز دی گئی ہے۔

نیپرا کے مطابق سماعت کے دوران وفاقی حکومت کی مجوزہ درخواست، سبسڈی، اور نرخوں میں ہم آہنگی پر غور کیا جائے گا، اور تمام متعلقہ فریقین اپنی رائے پیش کر سکیں گے۔

یاد رہے کہ چند روز قبل نیپرا نے بجلی کے بنیادی نرخ میں اوسطاً 1 روپے 50 پیسے فی یونٹ کمی کی منظوری دی تھی۔

ساتھ ہی، آئندہ مالی سال 2025-26 کے لیے بجلی کے بنیادی ٹیرف کا تعین کرتے ہوئے اوسط نرخ 34 روپے فی یونٹ مقرر کیا گیا۔