حکومت نے پی ٹی آئی کیساتھ مذاکرات کا اہم موقع گنوا دیا،بیرسٹر گوہر

چیئرمین پاکستان تحریک انصاف بیرسٹر گوہر نے دعویٰ کیا ہے کہ حکومت نے مذاکرات کا اہم موقع گنوادیا۔

صحافیوں سے بات چیت کرتے ہوئے چیئرمین پی ٹی آئی بیرسٹر گوہر نے کہا کہ بانی پی ٹی آئی عمران خان کو پاک فوج کی قربانیوں کا اعتراف ہے، لیکن فوج اورعوام میں خلیج نہیں ہونی چاہیے۔

بیرسٹر گوہرنے کہا کہ بیرسٹر شیر افضل مروت کو ڈسپلن کی خلاف ورزی پر پارٹی سے نکالا گیا،انہوں نے فواد چوہدری اورشعیب شاہین کےدرمیان تنازع پرافسوس کا اظہار کیا۔

واضح رہے کہ ایک ہفتہ قبل بیرسٹر گوہر نے اسٹیبلشمنٹ سے رابطے ختم ہونے کا اعتراف کرتے ہوئے کہا تھاکہ صرف ایک بار رابطہ ہوا تھا،دھیمے انداز اور دانش مندانہ فیصلوں کے تحت کوئی سیاسی حل تلاش کیا جانا چاہیے تھا۔

اڈیالہ جیل کے باہر میڈیا سے گفتگو کے دوران بیرسٹر گوہر کا کہنا تھا کہ صوابی جلسے کے حوالے سے بانی پی ٹی ائی بہت خوش تھے،انہوں نے کہا کہ 8 فروری الیکشن کے بعد پہلی دفعہ اتنے لوگ نکلے ہیں،ہم اپنا مینڈیٹ کبھی نہیں بھولیں گے۔

چیئرمین تحریک انصاف نے کہا کہ صوابی کا جلسہ تاریخ کا سب سے بڑاجلسہ تھا ووٹ اورمینڈیٹ جمہوریت کی بنیاد ہے۔

صحافی کی جانب سے عمران خان کی جانب سے آرمی چیف کو بھیجے گئے خط سے متعلق سوال کیا گیا جس پرانہوں نے جواب دیا کہ اسٹیبلشمنٹ سے ایک ہی رابطہ ہوا،اس کے بعد کوئی رابطہ نہیں ہوا۔