ملک بھر میں شدید بارشوں کاالرٹ جاری
ین ڈی ایم اےنے اسلام آباد، کراچی، لاہور اور سیالکوٹ سمیت ملک کے مختلف حصوں میں شدید بارشوں کا الرٹ جاری کردیا۔
محکمہ موسمیات کے مطابق 29 اگست سے 2 ستمبر تک اسلام آباد میں گرج چمک کے ساتھ بارشیں متوقع ہیں۔ پنجاب کے شمالی اور شمال مشرقی اضلاع راولپنڈی، اٹک، جہلم، چکوال، لاہور، گوجرانوالہ، سیالکوٹ، گجرات، نارووال، حافظ آباد اور منڈی بہاؤالدین میں 30 اور 31 اگست کو شدید بارشوں کا امکان ہے۔
وسطی و جنوبی پنجاب، بشمول ملتان، ڈی جی خان، راجن پور، لیہ، بھکر، ساہیوال، بہاولپور، بہاولنگر اور رحیم یار خان میں بھی 29 سے 31 اگست تک بارشوں کا امکان ہے، جس کے باعث نشیبی علاقے زیرآب آسکتے ہیں۔
خیبرپختونخوا میں بھی 29 تا 31 اگست کے دوران شدید بارشوں کی پیشگوئی کی گئی ہے جبکہ ملاکنڈ اور ہزارہ ڈویژن میں لینڈ سلائیڈنگ کا خدشہ ظاہر کیا گیا ہے۔ متاثرہ اضلاع میں چترال، دیر، سوات، بونیر، مانسہرہ، ایبٹ آباد، پشاور، نوشہرہ، مردان، ڈی آئی خان، ٹانک، کوہاٹ اور بنوں شامل ہیں۔
آزاد کشمیر کے مظفرآباد، باغ، حویلی، کوٹلی، میرپور اور بھمبر میں 29 اگست سے 2 ستمبر تک بارشیں متوقع ہیں، جبکہ گلگت بلتستان کے گلگت، اسکردو، ہنزہ، دیامر، استور، غذر اور گانچھے میں لینڈ سلائیڈنگ کا خطرہ ہے۔
این ڈی ایم اے کے مطابق کراچی میں 30 اگست سے 2 ستمبر تک موسلادھار بارشیں متوقع ہیں اور ممکنہ طور پر شہری سیلاب بھی آسکتا ہے۔ سندھ کے دیگر اضلاع ٹھٹہ، سجاول، بدین، تھرپارکر، حیدرآباد، دادو، سکھر، گھوٹکی، لاڑکانہ، جیکب آباد اور کشمور بھی بارشوں کی لپیٹ میں آئیں گے۔
بلوچستان کے گوادر، کیچ، پنجگور، خضدار، لسبیلہ اور قلات میں بھی 29 اگست سے یکم ستمبر تک بارشوں کا امکان ہے۔
