چناب میں اونچے درجے کا سیلاب، 450 دیہات خالی کرالئے گئے

بھارت سےدوسرا بڑا ریلا پاکستان کے دریائے چناب میں داخل ہوگیا ، ہیڈ مرالہ پر انتہائی اونچے درجے کا سیلاب ریکارڈ کیا گیا۔500دیہات خالی کرالئے گئے۔

انتظامیہ کے مطابق ہیڈ مرالہ پر سیلابی صورتحال کے باعث چناب پل ہر قسم کی ٹریفک کے لیے بند کردیا گیا ہے جبکہ سیلابی ریلا ہیڈ خانکی کی طرف بڑھ رہا ہے۔ خطرے کے پیش نظر متعدد دیہات خالی کرا لیے گئے ہیں اور پل ہیڈ خانکی کے قریب پہلا شگاف ڈالنے کی تیاریاں مکمل کر لی گئی ہیں، جو پانی کا بہاؤ 6 لاکھ کیوسک سے تجاوز کرنے پر ڈالا جائے گا۔

سیلابی خطرات کے پیش نظر مساجد سے اعلانات کے ذریعے 450 دیہات خالی کروائے جا رہے ہیں۔ بھلوال میں شدید کٹاؤ کے نتیجے میں کئی ایکڑ زرعی اراضی بھی تباہ ہوگئی ہے۔

دریائے راوی کے پانی سے ملتان بھی متاثر ہوا ہے اور عبدالحکیم کے قریب ریلوے ٹریک پر پانی چڑھ آیا ہے۔ دباؤ کم کرنے کے لیے ہیڈ محمد والا پر اکبر فلڈ بند میں شگاف ڈالنے پر غور کیا جا رہا ہے۔

ادھر بھارتی ہائی کمیشن نے پاکستان کو دریائے ستلج میں اونچے درجے کے سیلاب سے آگاہ کردیا ہے۔ مراسلے کے مطابق ہریکے زیریں، فیروزپور زیریں اور مقبوضہ جموں میں دریائے توی کے مقام پر بھی بلند درجے کا سیلاب متوقع ہے۔

دوسری جانب پی ڈی ایم اے پنجاب نے 5 ستمبر تک بارشوں کی پیش گوئی کرتے ہوئے خبردار کیا ہے کہ سیلابی صورتحال مزید شدت اختیار کر سکتی ہے۔