آئی ایم ایف سٹاف لیول معاہدہ : پاکستان کو 1.2 ارب ڈالر ملیں گے
عالمی مالیاتی ادارے (آئی ایم ایف) اور پاکستان کے مابین سٹاف لیول معاہدہ طےپاگیا، ایگزیکٹو بورڈ کی منظوری کےبعد پاکستان کو 1.2 ارب ڈالر کی قسط جاری کی جائے گی۔
آئی ایم ایف کی جانب سے جاری اعلامیے کےمطابق پاکستان کو ایکسٹینڈڈ فنڈ فسیلیٹی (EFF) کے تحت تقریباً ایک ارب ڈالرز جب کہ ریزیلینس اینڈ سسٹین ایبلٹی فسیلیٹی (RSF) کے تحت 20 کروڑ ڈالرز فراہم کیےجائیں گے۔
اعلامیے کے مطابق پاکستان سماجی شعبے کے اہداف حاصل کرنےمیں کامیاب رہا ہے جب کہ بےنظیر انکم سپورٹ پروگرام کے فنڈز میں اضافہ کر کے غربت میں کمی کےلیے اہم اقدامات کیے گئے۔تعلیم، صحت اور معاشی اصلاحات کے شعبوں میں وفاق اور صوبوں کی کارکردگی کو سراہاگیا اور کہا گیاکہ پاکستان کا مالیاتی خسارہ گزشتہ 14 سال کی بہترین سطح پر ہے۔
آئی ایم ایف کا کہنا ہے کہ پاکستان نے ٹیکس اصلاحات پر عملدرآمد اور پالیسی سطح پر اقدامات تیز کیےہیں،وفاق اور صوبوں کے مابین ٹیکس نیٹ بڑھانے اور ریونیو میں اضافے کےلیے تعاون پر زور دیاگیا ہے۔پاکستان میں افراط زر کو 5 سے 7 فیصد کے دائرے میں رکھنےاور زرمبادلہ کے ذخائر کو مستحکم بنانے کےلیے اقدامات جاری ہیں جب کہ سٹیٹ بینک سخت مالیاتی پالیسی برقرار رکھنے کےلیے پرعزم ہے۔
آئی ایم ایف نے توانائی کے شعبے سے متعلق واضح کیاکہ پاکستان کو سرکلر ڈیٹ میں کمی،بجلی کے نقصانات کم کرنے اور تقسیم کار کمپنیوں کی کارکردگی بہتر بنانےکے اہداف حاصل کرنا ہوں گے۔زرعی شعبے میں حکومتی مداخلت کم کرنے، پیداوار بڑھانے اور عالمی تجارت کے فروغ کےلیے نئی ٹیرف پالیسی اپنانا ہوگی۔
ماحولیاتی تبدیلیوں سے نمٹنے کےلیے اقدامات تیز کرنے،آبی وسائل کے بہتر استعمال اور توانائی اصلاحات کے تسلسل پر بھی زور دیاگیا ہے۔
