کیا پاکستان کے بعد ایران بھی ایک مثبت تبدیلی کی جانب گامزن ہے؟
اپنے تازہ سیاسی تجزیے میں عمار مسعود کہتے ہیں کہ 70 کی دہائی اور خاص طور پر اس کے اواخر میں ہونے والے واقعات کا پاکستان، پاکستان کے ہمسایہ ممالک اور اس خطے پر بہت گہرا اثر تھا۔ یوں لگتا تھا کہ اس وقت ایک نیا ورلڈ آرڈر لکھا گیا جس نے دنیا کی شناخت، ہیئت اور حیثیت ہی کو تبدیل کر دیا۔ ان سیاسی اور جغرافیائی تبدیلیوں کے اثرات زیادہ تر منفی رہے۔ لیکن پاکستان، ایران، بنگلہ دیش، افغانستان میں 70 کی دہائی کے آخر تک بہت کچھ بدل گیا تھا۔ آج مڑ کر دیکھیں تو لگتا ہے کہ کسی نے دنیا کو نقشے پر لال رنگ کے دائرے لگا کر ملکوں کے نصیب ہی بدل دیے تھے۔
عمار مسعود کہتے ہیں کہ سب سے پہلے پاکستان کی بات کرتے ہیں۔ ذوالفقار علی بھٹو دور کے آخری دن تھے۔ انکی حکومت کے خلاف 9 ستارے گردش میں آ چکے تھے۔ ملک بھر میں یورش جاری تھی۔ الیکشن نتائج آنے کے بعد دھاندلی، دھاندلی کا شور مچ رہا تھا۔ بھٹو صاحب حالات کو قابو کرنے کی کوشش کر رہے تھے مگر یوں لگتا تھا کہ کوئی نادیدہ ہاتھ حالات کو پہلے سے زیادہ خراب کر رہا تھا۔ ہر آنے والا دن افواہوں، خدشات سے بھرا تھا۔ اسی اثنا میں اچانک خود ساختہ مرد مومن مرد حق ضیالحق عرف ‘یک’ نے 5 جولائی 1977 کو بھٹو حکومت کی بساط الٹ دی۔ تب 9 ستاروں کو پتہ چلا کہ وہ تو ایک جرنیل کے ہاتھوں استعمال ہوئے ہیں۔
ضیاءالحق کے آنے کے بعد پاکستان بدل گیا۔ اس سے پہلے پاکستان ایک ترقی کرتا ملک تھا۔ دنیا ہماری معیشت کی تعریف کرتی تھی مگر پھر ہم افغان جنگ میں استعمال ہوئے، اپنے ملک کو برباد کیا۔ کلاشنکوف کلچر، دہشتگردی، لسانی سیاست اور ہیروئن کو اپنے ملک میں بسایا۔ سماج کو تباہ کیا گیا۔ اور جب یہ کام حضرت ضیاء الحق نے تسلی بخش طریقے سے کر دیا تو ایک دن ان کا جہاز ایک دھماکے سے فضا میں پٹ گیا اور موصوف جل کر بھسم ہو گئے۔ لیکن اس دور میں آنے والی تبدیلیوں کے اثرات اب تک پاکستان کو چاٹ رہے ہیں۔
عمار کہتے ہیں کہ دوسری جانب ایران کے حالات دیکھیں۔ اسی دہائی میں ایران میں شاہ کی حکومت کمزور پڑ رہی تھی۔ امام خمینی کے ظہور کا زمانہ قریب آ رہا تھا۔ تہران کی ہر دیوار پر ’مرگ بر امریکا ‘ اور ’درود بر خمینی‘ کے نعرے لکھے تھے۔ پاسداران انقلاب کا بیج رکھا جا چکا تھا۔ شاہ کا تخت لرز رہا تھا۔ پھر ایک دن وہی ہوا جس کا شاہ کو ڈر تھا۔ انقلاب لانے والوں کے صبر کا پیمانہ لبریز ہو گیا۔ شاہ ایران نے 16 جنوری 1979 کو فرار ہونے کو غنیمت جانا۔ امام خمینی نے پہلوی دور اقتدار کو ختم کر کے ’اسلامی‘ حکومت کی بنیاد ڈالی۔ یہ وہ تبدیلی تھی جس کا ایران پر آج تک اثر ہے۔ اس تبدیلی سے پہلے ایران ایک امیر، ترقی یافتہ ملک تھا۔ اس کی معیشت مثالی تھی۔ دنیا کے ساتھ اس کے تعلقات قابل فخر تھا مگر انقلاب کے بعد ایران بہت بدل گیا۔
انقلاب ایران کے بعد خواتین کے لیے مشکلات پیدا ہو گئیں، پردہ لازم قرار دیا گیا، انقلاب بسا اوقات جنون کی حد سے آگے گزر گیا۔ ایران نے اپنے آپ کو عراق جنگ میں جھونک دیا۔ بین الاقوامی پابندیوں سے عوام غریب تر ہوتے گئے اور معیشت بدحال ہو گئی۔ آج ایران اسرائیل سے دست و گریبان ہے۔ سب مسلم ممالک کی ہمدردیاں ایران کے ساتھ ہیں مگر ایران اس جنگ میں خود اپنا دفاع کرنے میں بری طرح ناکام ہو رہا ہے۔ اگر ہم بنگلہ دیش کی جانب توجہ کریں تو شیخ مجیب الرحمان، جسے لوگ ’قوم کا باپ‘ کہتے تھے، اسے قتل کر دیا۔ اگست 1975 میں یونے والی اس واردات میں شیخ مجیب کے خاندان کو چن چن کر قتل کر دیا گیا۔ شیخ حسینہ واجد لندن میں ہونے کی وجہ سے زندہ بچ گئیں۔ اس کے بعد جنرل ضیاالرحمان نے مارشل لا لگا دیا۔ یہ بنگلہ دیش کے لیے بہت بڑی تبدیلی تھی۔ اس کو پاکستان سے الگ ہوئے 4 سال ہی ہوئے تھے کہ اختلافات نے پوری قوم کو گھن کی طرح چاٹ لیا۔
بنگکہ دیش میں جنرل ضیا الرحمان نے اقتدار سنبھالا اور خود ساختہ ترامیم کے ذریعے 5 جولائی 1977 کو صدر بھی منتخب ہوئے۔ انہوں نے بنگلہ دیش کی معیشت کو بہت سنبھالا دیا۔ ان کا بھی قتل ہو گیا جس کے بعد جنرل حسین ارشاد کا دور آیا جو 90 تک چلا۔ لیکن جو کچھ بنگلہ دیش میں70 کی دہائی میں ہوا، اس کے اثرات بہت دیرپا رہے۔ آج اسی وجہ سے بنگلہ دیش بحرانوں کا مرکز ہے۔
عمار مسعود کہتے ہیں کہ 70 کی دہائی میں خطے میں سب سے بڑی تبدیلی افغانستان میں آئی۔ نور محمد ترکئی اور حفیظ اللہ امین کی حکومتیں ریت کی دیوار ثابت ہوئیں۔ روس نے 24 دسمبر 1979 کو افغانستان پر حملہ کر دیا۔ پاکستان اس لڑائی میں امریکی تائید سے کود پڑا۔ دنیا کی ایک بڑی جنگ اس خطے میں لڑی گئی۔ دنیا کی سب سے بڑی سپر پاور کو شرمناک شکست ہوئی۔ جنگ کے بعد افغانستان طالبان کے قبضے میں آ گیا اور پوری دنیا کے لیے خطرے کی علامت بن گیا۔ اس سے پہلے کا افغانستان پرامن بھی تھا اور ماڈرن بھی۔ یہاں ترقی بھی ہو رہی تھی اور عوام بھی خوشحال تھے۔ جنگ نے پورا ملک اور خطہ ہی برباد کر دیا۔
70 کی دہائی گزر گئی اور اب 2025 ہے لیکن دنیا میں کچھ ایسے واقعات ہو رہے ہیں جو بتاتے ہیں کہ 70 کی دہائی کے زخموں پر مرہم رکھا جا رہا ہے۔ افغانستان میں ایک ایسی حکومت آ گئی ہے جو در پردہ طالبان سے چھٹکارا چاہتی ہے۔ بنگہ دیش میں حسینہ واجد کا ظالمانہ دور بیت گیا۔ ایران میں رجیم چینج کی آوازیں آ رہی ہیں اور اگر ایران اسرائیل سے مار کھا گیا تو موجودہ ایرانی حکومت کو اپنے لیے قائم رکھنا ناممکن ہو جائے گا۔ پاکستان میں بھی بہت تبدیلی آ چکی ہے۔ طالبان کے ہمدرد عمران خان نے جو کچھ اس ملک کے ساتھ 2011 کے بعد سے کیا، اس بدامنی کا خاتمہ ہو چکا ہے۔ ایک مستحکم حکومت وجود میں آ چکی ہے۔ معیشت کی بحالی کا سفر جاری ہو چکا ہے۔
عمار مسعود کہتے ہیں یوں لگتا ہے 70 کی دہائی کی غلطیوں سے سبق سیکھ کر دنیا کو ایک نیا ورلڈ آرڈر دیا جا رہا ہے جس میں معیشت اور عوام کی بحالی بنیادی جزو ہے۔ شدت پسندی اور دہشتگردی کے خلاف سب اکھٹے ہو رہے ہیں۔
یاد رکھیں! اگر دنیا اسی طرح ظلم سے نفرت کرتی رہی تو یاد رکھیے اسرائیل کا ظلم بھی نہیں رہے گا۔ اس مرتبہ تبدیلی بھارت میں بھی آئے گی اور مودی کی نفرت انگیز سیاست تاریخ کے قبرستان میں دفن ہو جائے گی۔ جس طرح 70 کی دہائی نے دنیا تبدیل کر دی تھی اسی طرح اس دہائی میں ہونے والے واقعات سے لگتا ہے دنیا اب بھی بدلے گی لیکن اس مرتبہ تاریخ کا فیصلہ پاکستان کے حق میں ہو گا۔
